سفیر روسیه در تاجیکستان در مصاحبه با خبرگزاری تاس گفته است که طالبان هنوز نتوانسته امنیت مرزها را تامین کند. سمیون گریگوریف گفت افراطگرایان در سال ۲۰۲۳ بارها تلاش کردند که از افغانستان به تاجیکستان نفوذ کنند.
او در این مصاحبه که روز دوشنبه (۲۷ قوس) منتشر شده گفت: «ما هیچ پیشرفت خاصی را در وعدههای طالبان در بخش تامین امنیت کشورهای همسایه افغانستان نمیبینیم.»
سمیون گریگوریف توضیح داد: «در طول سال جاری، افراطگرایان در تلاش نفوذ به خاک تاجیکستان از مرز افغانستان بودند که خوشبختانه تمام این حملات به سرعت توسط نیروهای امنیتی تاجیکستان سرکوب شدند.»
این دیپلومات روسیه افزود که افغانستان در حوزه اجتماعی و اقتصادی هم رو به سقوط است و این کشور به معنای واقعی کلمه در آستانه یک بحران انسانی شدید است.
اظهارات او در حالی مطرح شده که ولادیمیر پوتین و امامعلی رحمان، روسای جمهور روسیه و تاجیکستان ماه گذشته در مسکو درباره افغانستان گفتوگو کردند.
سفیر روسیه در تاجیکستان میگوید توجه جدی رهبران روسیه و تاجیکستان به موضوع افغانستان کاملا موجه است و مستلزم هماهنگ سازی مداوم است.
او از افزایش قاچاق مواد مخدر صنعتی از افغانستان هم خبر داد و انتقاد کرد که کشورهای غربی عملا بودجه برنامههای مبارزه با مواد مخدر از افغانستان را کاهش دادهاند.
سفیر روسیه از هجوم گسترده پناهجویان اخراجی از پاکستان به ولایات شمالی هم ابراز نگرانی کرده است. به گفته وی، در این شرایط، تغییر ترکیب قومی جمعیت در شمال افغانستان امکانپذیر است.
سمیون گریگوریف هشدار داد که «ممکن است عناصر تروریستی در میان آوارگان وجود داشته باشند.»
او گفت روسیه تمام تلاش خود را برای جلوگیری از حملات به متحدان خود که یکی از آنها تاجیکستان است، انجام خواهد داد.
خبرگزاری دولتی تاجیکستان ماه سنبله سال جاری از کشته شدن سه «تروریست» به دست نیروهای امنیتی این کشور در مرز افغانستان خبر داد. کمیته امنیت ملی تاجیکستان در آن زمان اعلام کرد که این افراد اعضای گروه «جماعت انصارالله» بودند و از افغانستان وارد این کشور شده بودند.
در ماه ثور امسال نیز کمیته امنیت ملی تاجیکستان اعلام کرد که دو عضو سازمانهای تروریستی بینالمللی که از مرز افغانستان وارد تاجیکستان شده بودند، هدف قرار گرفتند و کشته شدند.
مقامهای تاجیکستان و سایر کشورهای آسیای میانه، بارها از افزایش فعالیتهای تروریستی در افغانستان و سرازیر شدن آنها به این کشورها، ابراز نگرانی کردهاند.
