د طالبانو د افغانستان بانک رییس ملا هدایت الله بدري د درملنې په موخه ترکیې ته انتقال شوی
افغانستان انټرنشنل- پښتو ته په کابل کې یوې باوري سرچینې وویل، چې د طالبانو د افغانستان بانک رییس ملا هدایت الله بدري د درملنې لپاره د ترکیې هېواد ته لېږل شوی دی.
تېره اونۍ د جمعې په ورځ د طالبانو د مالیې پخوانی وزیر او د طالبانو د افغانستان بانک مشر هدایت الله بدري (ملا ګل اغا اخوند) په یوې پېښې سخت ټپي شوی و.
هغه د جمعې په ورځ (د وږي په ۱۰مه) د هرات – کندهار پر لویه لاره په یوه ترافیکي پېښه کې له ټپي کېدو وروسته د کندهار روغتون ته وړل شوی و.
سرچینې وايي، چې د طالبانو د دفاع وزیر ملا یعقوب مجاهد په کابل کې د ترکیې له سفیر سره د نوموړي د درملنې په اړه خبرې کړې وې او له تفاهم وروسته هدایت الله بدري له کابل څخه ترکیې ته انتقال شوی دی.
وروستي معلومات ښيي، چې د طالبانو دغه چارواکي پر سر، لاسونو او پښو ټپي شوی خو د روغتون سرچينې د هغه طبي دوسيې او د هغه د ټپونو د څرنګوالي په اړه څه نه وايي.
دا لا نه ده څرګنده چې دا ترافيکي پېښه څنګه رامنځته شوه، خو په پیښه کې د ملا بدري موټر چلوونکي خپل ژوند له لاسه ورکړی.
د دې خبر له خپرېدو وروسته د طالبانو تر لاس لاندې د افغانستان مرکزي بانک هم د پېښې پخلی وکړ او په يوه خبرپاڼه کې يې ليکلي وو، چې هدایت الله بدري برسیرن ټپي شوی او روغتیايي حالت یې «د ډاډ وړ دی.»
د امریکايي سرچینو په پر بنسټ، هدایت الله بدري طالبانو ته د مالیو او عوایدو د برابرولو ترڅنګ د مخدره توکو په قاچاق کې لاس درلود. په دې وروستیو کې د مالیې په وزارت کې له ملا هبت الله سره د هغه اړیکې خړې پړې شوې او د طالبانو مشر هغه له وزارته ګوښه او د مرکزي بانک د مشر په توګه یې وټاکه.
