د طالبانو د غزني ولایت امنیه قومندانۍ وایي، ددغه ولایت د ګیرو ولسوالۍ په شیرزاد کلي کې د یوه لاسي بم چاودنې له امله یوې ښځې خپل ژوند له لاسه ورکړی دی. طالب امینه قومندانۍ زیاته کړې، وژل شوې میرمنې لاسي بم بیرون موندلی او کورته یې وړی و.
هرات کې د طالبانو مطبوعاتي دفتر وايي، د دغه ولایت د اسلامکلا له ګمرک څخه یې د بېکیفیته نفتي توکو ۲۹ ټانکرونه د ټاکل شویو کیفیتي معیارونو د نه پوره کولو له امله بېرته صادرونکي هېواد ته ورګرځولي دي.
د پاکستان بهرنیو چارو وزارت خبر ورکړی، چې د ایکو سازمان د بهرنیو چارو وزیرانو په ۳۰مه غونډه کې د ګډون په موخه د یو شمېر هېوادونو استازي اسلام اباد ته رسیدلي؛ خو د دغه هېود له لوري د طالبانو د نه بللو له امله، د غونډې په بنر کې د افغانستان ملي بیرغ شته خو استازي نه تر سترګو کېږي.
د ملګرو ملتونو سرمنشي انتونیو ګوترېش د سازمانیافته نړیوالو جرمونو د مخنیوي او پر وړاندې د مبارزې نړیواله ورځې په مناسبت ویلي، انلاین درغلۍ د سازمانیافته نړیوالو جرمونو له چټکو پراخېدونکو بڼو څخه دي چې له دې لارې جنایي شبکې میلیاردونه ډالر عاید برابروي.
د روغتیا نړیوال سازمان وايي، په نړۍ کې هر کال ۱۳،۴ میلیونه ماشومان له وخته مخکې زېږې او شاوخوا ۹۰۰ زره یې مري. یاد سازمان وايي، د ارزانه روغتیایي خدمتونو له لارې د دغو مړینو د درې پر څلورمې برخې مخنیوی کېدای شي.
د طالبانو د ریاستالوزرا اقتصادي مرستیال ملا عبدالغني برادر وايي، افغانستان د طبیعي ګازو پراخې زېرمې لري او پانګوال کولای شي په استخراج او پروسس کې یې پانګونه وکړي. نوموړي ټینګار کړی چې د ګازو استخراج باید د منل شویو معیارونو له مخې ترسره شي.
د طالبانو د مالیې وزیر محمد ناصر اخوند، ایران ته د خپل سفر په ترڅ کې د دغه هېواد د کرنې له وزیر غلامرضا نوري قزلجه سره د اقتصادي او سوداګریزو اړیکو د پراختیا په موخه لیدلي. ویل شوي چې په غونډه کې د افغاني محصولاتو پر صادراتو او د ګمرکونو د ۲۴ ساعته فعالیت په اړه هم خبرې شوي دي.
د طالبانو د ریاستالوزرا اقتصادي معاونیت خبر ورکړی، چې د یاد ریاست اقتصادي مرستیال ملا عبدالغني برادر په جوزجان ولایت کې د بیات پاور ۴۰ مېګاواټه ګازي برېښناکوټ د بېرته فعالېدو چارې پرانیستې دي.
سرچینو افغانستان انټرنشنل ـ پښتو ته ویلي، د پنجشېر د عبداللهخېلو درې د خانهخېل سیمې یو ځوان دادالرحمان د اوږدې بېکارۍ او اقتصادي ستونزو له امله تېره ورځ په خپل کور کې ځان زندۍ کړی. سرچینې وايي، نوموړی یو ځل د طالبانو له خوا نیول شوی او شکنجه شوی هم و.
د طالبانو تر واک لاندې ارګ څخه په خپره شوې خبرپاڼه کې ویل شوي، د افغانستان لپاره د بریتانیا ځانګړي استازي، پاکستان ته په نږدې راتلونکې کې د سفر خبر ورکړی او ویلي یې دي چې غواړي له پاکستاني چارواکو سره د طالبانو او اسلاماباد ترمنځ د خبرو او تفاهم د رامنځته کولو په اړه خبرې وکړي.
د طالبانو تر واک لاندې د المپیک، بدني روزنې او سپورټ عمومي ریاست خبر ورکړی، چې د میدان وردګ ولایت په مرکز میدان ښار کې د پنځو ولایتونو د ۱۰۵ ورزشکارانو ترمنځ د ووشو سیالۍ ترسره شوې، چې په پایله کې یې لوګر لومړی، غزني دویم او کابل درېیم مقام خپل کړی دی.
د کابل ښار یوه اوسېدونکي افغانستان انترنېشنل - پښتو ته په استولي پیغام کې ویلي، دوه نیم کاله کېږي چې دده په ګډون یو شمېر ځوانانو د پولیسو له روزنیز مرکز څخه فارغ شوي، خو د طالبانو د کورنیو چارو وزارت اداري مرستیال، نه د دوی د فراغت اسناد ورکوي او نه هم دندې.
د بشري حقونو د فعالانو اتحاد د جرمونو نړۍوالې محکمې (ICC) لهخوا د افغانستان د دوسیې د اصلي برخې د تړلو پرېکړه د اندېښنې وړ بللې او ویلي یې دي، چې دغه اقدام د جګړو د قربانیانو پر وړاندې له عدالت سره خیانت دی.
د الجزیرې د راپور له مخې، د طالبانو حکومت د بدخشان په واخان دهلېز کې د چین پولې ته غځېدلی سړک پرانیستی؛ خو بیجینګ د امنیتي اندېښنو له امله په دغه لار سوداګرۍ ته اجازه نه ورکوي. طالبان تمه لري، چې دغه لار به له پاکستان نه د افغانستان سوداګریزه اتکا کمه کړي.
سرچینو افغانستان انټرنشنل ته ویلي، په کابل کې د طالبانو د مشر ملا هبتالله اخوندزاده په ملاتړ او د هغه د فرمانونو د بشپړ پلي کېدو په موخه د دیني عالمانو یوه لویه غونډه جوړېږي چې د افغانستان له یوشمېر ولایتونو څخه به دیني عالمان او د هبتالله ملاتړي پهکې ګډون وکړي.
د برېتانیا ګارډین ورځپاڼې راپور ورکړی، په امریکا کې مېشت تر ۱۵۰ ډېر هغه افغان کډوال چې افغانستان ته د اېستلو له ګواښ سره مخ دي؛ د ټرمپ ادارې لهخوا د کډوالو پرضد د سختو سیاستونو له امله له اندېښنې او ناروښانه برخلیک سره مخ شوي دي.
په خوست کې د طالبانو د والي ویاند مستغفر ګربز وایي، د دغه ولایت د سپېرې ولسوالۍ اړوند د شنو ونو د پرې کولو په تور درې کسان نیول شوي او د ونو د غوڅولو وسایل او ماشینونه هم ترې ضبط شوي دي.
د افغانستان ازادۍ جبهې ادعا کړې، چې د کابل ولایت په قرهباغ ولسوالۍ کې یې د طالبانو پر یوې امنیتي پوستې برید کړی چې په پایله کې یې یو طالب وژل شوی او دوه نور ټپیان دي.
د خیبر پښتونخوا والي فیصل کریم کنډي ادعا کړې، چې په دغه ایالت کې هره میاشت نږدې ۹۰ کیلوګرامه سره زر په ناقانونه توګه کېندل کېږي او شاوخوا ۸۰ سلنه یې افغانستان ته قاچاق کېږي.
افغان خبریال او رسنیز فعال عصمتالله کوهسار د زړه ناروغۍ له امله د ۴۰ کلونو په عمر په کابل کې مړ شوی دی. هغه نږدې دوه لسیزې په ژورنالېستیک ډګر کې فعالیت کړی و او له کورنیو رسنیو سربېره یې له نړۍوالو رسنیو، په ځانګړي ډول له «والسټریټ ژورنال» سره همکاري کړې وه.
د افغانستان لپاره د برېتانیا ځانګړي استازي د طالبانو د رییسالوزراد دفتر له رییس سره په ویډیويي خبرو کې ویلي، لندن هڅه کوي د طالبانو او پاکستان ترمنځ اختلافونه حل او د دواړو لورو اړیکې عادي کړي.
د ملګرو ملتونو سرمنشي انتونیو ګوترېش د اقلیمي بدلونونو په اړه د علمي حقایقو پر بیانولو ټینګار کړی او ویلي یې دي، چې د دغه حقیقتونو د ناخوښۍ له امله به چوپ پاتې نهشي. ورته مهال د ملګرو ملتونو د راپورونو له مخې، افغانستان د اقلیمي بدلونونو له سختو اغېزمنو هېوادونو څخه دی.