د طالبانو امر بالمعروف وزارت ویلي، چې پر ټولنیزو رسنیو د بهرني سریال د کرکټر د جامو اغوستلو د سټایل خپرولو په جرم یې په هرات کې څلور ځوانان نیولي دي. یاد وزارت ویلي، چې دغو ځوانانو د یوه بهرني سریال د کرکټر «توماس شلبي» د جامو اغوستلو سټایل تعقیباوه.
د یاد وزارت ویاند سیف خیر د یوې ویډیو په خپرولو سره په هرات کې د طالبانو د امربالمعروف وزارت چارواکو له قوله ویلي، چې یاد ځوانان د هرات ولایت د انجیل ولسوالۍ اوسېدونکي دي او پر ټولنیزو رسنیو یې د یو بهرني سریال د کرکټر «توماس شلبي» د جامو اغوستلو سټایل تعقیباوه.
طالبانو ویلي، چې یاد ځوانان د «توماس شلبي» ډلې په نوم مشهور دي او په ټیکټاک او نورو ټولنیزو رسنیو کې یې د بهرني سریال کرکټر ته د ورته جامو په اغوستلو ویډیوګانې خپرولي.
یاد وزارت ویلي، چې دغو کسانو ته یې لازمې سپارښتنې کړې او هغوی پر خپلو کړنو «پښیماني» ښودلې ده.
طالبانو ویلي، چې یاد سټایل د افغاني او اسلامي ارزښتونو سره په ټکر کې دي او د غیر مسلمان کړنې باید تقلید نه شي.
د طالبانو امر بالمعروف وزارت تردې وړاندې هم د ټولنیزو رسنیو او ټیکټاک فعالان نیولي او له هغوی څخه یې جبري اظهارات اخیستي دي.
