سرچینې وايي، طالبانو په یوې خبرتیا کې د بدخشان د سرحدي ولسوالیو له ځوانانو غوښتي چې له پوځ سره یې یوځای شي. په دې خبرتیا کې د شاملېدو لپاره ګڼ شرایط ټاکل شوي، چې له ۲۰ تر ۲۴ کلونو د عمر محدودیت او د موبایل پر کارولو بندیز هم پکې شامل دي.
په بدخشان کې باخبرو سرچینو افغانستان انټرنشنل ته ویلي، چې د طالبانو سیمهییزو چارواکو د شنبې په ورځ، د چنګاښ په ۱۳مه، د دې ولایت په یو شمېر سرحدي ولسوالیو کې له ځوانانو سره کتلي او له هغوی یې غوښتي چې د طالبانو د پوځ په لیکو کې داخل شي.
د دغو سرچینو په وینا، د دې لیدنو لویه برخه د بدخشان په سرحدي سیمو کې له اسماعیليمذهبه ځوانانو سره شوې ده.
د ترلاسه شویو معلوماتو پر بنسټ، د طالبانو د پوځ د جلبوجذب قومندانۍ د پامیر، واخان، اشکاشم، زیباک، کران او منجان ولسوالیو له ځوانانو غوښتي چې د دې ډلې په پوځ کې د شاملېدو لپاره نوملیکنه وکړي.
هممهاله، په بدخشان کې د طالبانو د پوځ د جلبوجذب قومندانۍ د رسمي خبرتیا یوه نسخه هم افغانستان انټرنشنل ته رسیدلې ده.
دا سند ښيي چې طالبانو د لږ تر لږه پنځو سرحدي ولسوالیو ځوانان په پوځ کې شاملیدو ته بللي او د داوطلبانو عمر یې د ۲۰ او ۲۴ کلونو ترمنځ ټاکلی دی.
په دې خبرتیا کې ټینګار شوی چې داوطلبان باید د قومي مشرانو او د جوماتونو د ملاامامانو له خوا تایید شي، د اوسېدو ځای یې په افغانستان کې دننه وي او ژمنه وکړي چې نظامي روزنیزه دوره به په بشپړ ډول پای ته رسوي. دغه راز په دې سند کې راغلي چې د نظامي زدهکړو پر مهال د موبایل کارول منع دي.
د دغه خبرتیا له خپرېدل او د ځوانانو سره د طالب چارواکو د لیدنو پیل، په دغه ولایت کې د دې ډلې د ځواکونو ترمنځ د خپلمنځي اختلافاتو له زیاتېدو سره هممهاله ترسره کېږي.
د راپورونو له مخې په بدخشان کې د طالبانو د تاجیکتباره قومندان جمعه فاتح د ناخوښۍ له څرګندولو وروسته، دې ډلې په دغه ولایت کې خپل نظامي تشکیلات پیاوړي کړي او امنیتي تدابیر یې زیات کړي دي.
سیمهییزو سرچینو مخکې افغانستان انټرنشنل ته ویلي وو چې طالبانو د جمعه فاتح د نیولو او مهارولو لپاره له کابل څخه بدخشان ته مرستندویه ځواکونه استولي دي.
د یوه عیني شاهد په وینا، یوازې د شنبې په ورځ د طالب ځواکونو له ۳۵ څخه ډېر رینجر موټر دغه ولایت ته داخل شوي دي.
