نړۍ

د ایران قضایه قوې اعلان کړی، چې په کرج ښار کې یې درې کسان د جنورۍ میاشتې د اعتراضونو او له امریکا او اسراییل سره د همکارۍ په تور اعدام کړي دي. د راپورونو له مخې، پر دغو کسانو تور و چې په کرج ښار کې یې د برېښنا پر یوه سب سټېشن برید کړی او دولتي تاسیساتو ته یې اور اچولی دی.

د طالبانو ویاند ذبیح‌الله مجاهد د چین او طالبانو ترمنځ د اړیکو د ترینګلتیا په تړاو راپورونه رد کړي او ویلي یې دي چې د کابل او بیجینګ اړیکې د پخوا په پرتله لاپیاوړې دي. هغه زیاته کړې چې له چین سره د اړیکو ترڅنګ سوداګریزې همکارۍ هم پراخې شوې دي.

د بشري حقونو فعالانو اتحاد له طالبانو سره د فرانسې د تخنیکي خبرو د پیل په غبرګون کې، چې موخه یې افغانستان ته د بې‌اسناده کډوالو بېرته ستنول بلل شوې، اندېښنه څرګنده کړې او له اروپايي هېوادونو یې غوښتي چې له دغه ډلې سره هر ډول سیاسي او تخنیکي تعامل ودروي.

د ایران دولتي رسنۍ ویلي، د جنورۍ میاشتې د حکومت ضد لاریونونو پر مهال د وسله‌والو بریدونو، د عامه تاسیساتو د سوځولو او له اسراییل او امریکا سره د همکارۍ په تور درې تنه نیول شوی، اعدام شوي دي.

رویټرز خبري اژانس راپور ورکړی چې د سعودي عربستان د ملکي دفاعي ادارې له لوري د احتمالي ګواښ په اړه د خبرداري له خپرېدو لږ وروسته، د دغه هېواد په پلازمېنه ریاض کې د څو درنو چاودنو غږونه اورېدل شوي دي.

د ملګرو ملتونو د نړیوالو اړیکو په چارو کې د سرمنشي مرستیالې ملیسا فلمینګ، د افغان نجونو د زده‌کړو د دوامدار محرومیت په اړه اندېښنه څرګنده کړې او په افغانستان کې یې د نجونو پر زده‌کړو د لګېدلي بندیز د سمدستي لرې کېدو غوښتنه کړې ده.

واشنګټن د عراق حکومت ته خبرداری ورکړی، چې که د دغه هېواد له خاورې فعالې وسله‌والې ډلې د احتمالي جګړې بیا پیل په صورت کې د ایران په ملاتړ جګړه کې ښکېلې شي، د دغو ډلو مرکزونه به د امریکا له بریدونو سره مخ شي.

د پولنډ په کراکوف ښار کې یوه وسله‌وال کس شپږ تنه په ډزو وژلي او ۱۷ نور یې ټپیان کړي دي. پولیس وايي، یاد وسلوال یې نیولی او د هغه له کور څخه یې د درېیو نورو کسانو مړي هم موندلي دي. د پولند ولسمشر دا پیښه خونړۍ بللې او د قربانیانو په درناوي یې دوه ورځي ملي ماتم اعلان کړی دی.

د ترکیې ولسمشر رجب طیب اردوغان له خپل امریکايي سیال ډونالډ ټرمپ سره په ټیلیفوني خبرو کې د انقرې او واشنګټن پر دوه‌اړخیزو اړیکو او د واشنګټن او تهران ترمنځ پر ترینګلتیاوو خبرې کړې دي.

د متحده عربي اماراتو د فدرالي ملي شورا د دفاع، کورنیو او بهرنیو چارو د کمېټې مشر علي راشد النعیمي وايي، د قطر په منځګړیتوب د واشنګټن او تهران په اټومي خبرو کې د پرمختګ نښې لیدل کېږي. نوموړي د دواړو خواوو ترمنځ د سیاسي هوکړې په اړه هیله څرګنده کړې ده.

د امریکا مرکزي قوماندانۍ (سنټکام) وايي، امریکايي ځواکونو د شنبې په ورځ (د لړم ۱۶مه) د عمان په خلیج کې د «هودا» په نوم یوه سوداګریزه بېړۍ وروسته له هغې درولې چې څو ځلې یې د ایران د سمندري محاصرې د ماتولو هڅه وکړه.

د اسراییل ولسمشر اسحاق هرتزوګ د شنبې په ماښام (د لړم ۱۶مه) اعلان کړی، چې د نوي حکومت د جوړولو دنده به د «یاشار» ګوند مشر ګادي ایزنکوټ ته وسپاري. د هغه په وینا، دغه دنده به د یکشنبې په ورځ (د لړم ۱۷مه) د اسراییل په ولسمشرۍ ماڼۍ کې په رسمي توګه ایزنکوټ ته وسپارل شي.

ایراني رسنیو د شنبې په ورځ راپور ورکړی، چې د ایران د بندرعباس، سیریک، جاسک او قشم په شاوخوا سیمو کې د څو چاودنو غږونه اورېدل شوي دي. ایراني چارواکو په رسمي توګه د دغه چاودنو د څرنګوالي په اړه څه نه‌دي ویلي.

د ملګرو ملتونو د ماشومانو ملاتړ صندوق (یونېسف) خبرداری ورکړی، چې په غزه کې د سختو بارانونو او سړې هوا له امله په لنډمهاله خېمو کې مېشتې کورنۍ او ماشومان له ناوړه بشري شرایطو سره مخ دي او د هوا له سړېدو او بارانونو څخه د ځان ساتنې لپاره کافي امکانات نه‌لري.

د پاکستان د احصایې ادارې راپور ورکړی، چې په دغه هېواد کې د روانې اوونۍ پرمهال د کلني انفلاسیون کچه ۱۲.۳۱ سلنې ته لوړه شوې ده. د یادې ادارې د شمېرو له مخې، د برېښنا، تېلو او نورو انرژۍ توکو د بیو لوړوالی د انفلاسیون د زیاتېدو اصلي لاملونه دي.

د ملګرو ملتونو د ماشومانو ملاتړ صندوق (یونېسف) خبرداری ورکړی، چې په جګړه‌ییزو سیمو کې د اوبو پر سیستمونو بریدونه د ماشومانو پر ژوند ناوړه اغېزې کوي او د څښاک اوبو نشتوالی هغوی له روغتیايي خدمتونو، مناسبې تغذیې او زده‌کړو بې‌برخې کوي.

مصر د شنبې په ورځ د لیبیا په پلازمېنه طرابلس کې له ۱۲ کلونو ځنډ وروسته خپل سفارت بېرته پرانیست. د مصر د بهرنیو چارو وزارت په یوه اعلامیه کې دغه اقدام د لیبیا له لوېدیځ مېشتې ادارې سره د اړیکو د نږدې کېدو څرګندونه بللی دی.

د پولنډ پولیسو ویلي چې د شنبې په ورځ د دغه هېواد د سوېلي کراکوف ښار په مرکزي بازار کې د ډزو له امله پنځه کسان وژل شوي ۱۰ نور ټپيان دي. د پولیسو ویلي، بریدګر هم د پولیسو په ډزو کې وژل شوی دي.