د خوړو نړۍوال پروګرام وايي، په افغانستان کې یې مرستې ۸۰ سلنه راکمې شوې دي
د ملګرو ملتونو د خوړو د نړۍوال پروګرام مرستیال اجراییوي مشر کارل سکاو ویلي، چې په افغانستان کې بېوزلي او خوارځواکي مخ په زیاتېدو دي او دا وضعیت به په ژمي کې نور هم خراب شي.
د ملګرو ملتونو د خوړو د نړۍوال پروګرام مرستیال اجراییوي مشر کارل سکاو ویلي، چې په افغانستان کې بېوزلي او خوارځواکي مخ په زیاتېدو دي او دا وضعیت به په ژمي کې نور هم خراب شي.
هغه وویل، چې د مالي سرچینو د کمښت له امله په افغانستان کې د دوی مرستې د ۱۰ میلیونو خلکو څخه ۲ میلیونو ته راټیټې شوې دي.
د ملګرو ملتونو دغه استازي له الجزیرې سره په یوه مرکه کې د نړۍ په کچه د بشري وضعیت په اړه خبرې وکړې او ویې ویل، چې نړۍ د بشري اړتیاوو د بېساري زیاتوالي او د مالي سرچینو د چټک کمښت له «بشپړ توپان» سره مخ ده.
ښاغلي سکاو وویل: «په ځینو سیمو کې موږ خپل عملیات ۸۰ سلنه کموو. په افغانستان کې په هغو سیمو کې چې مونږ پوهېږو د ژمي په را رسېدو سره به ماشومان ژوند وبایلي، نه یو توانېدلي چې مخکې له مخکې خوراکي توکي چمتو او ذخیره کړو.»
په افغانستان کې د خوړو نړۍوال پروګرام خبرداری ورکړی، چې د ښځو او ماشومانو په منځ کې خوارځواکي به د پام وړ لوړه شي او هغې کچې ته به ورسېږي، چې په وروستیو کلونو کې بې ساري ده.
افغانستان د نړۍ د خوړو له سختو ناورینونو سره مخ دی، چې ۳.۵ میلیونه ماشومان له شدیدې خوارځواکۍ سره مخامخ دي. د طالبانو د واکمنۍ پر مهال اټکل کېږي، چې ۵ میلیونه میندې او ماشومان په خوارځواکۍ اخته دي.
د اوچا وروستی راپور هم ښیي، چې ۴۸ سلنه افغانان د فقر تر کرښې لاندې ژوند کوي او له ۲۲ میلیون څخه ډېر خلک بشري مرستو ته اړتیا لري.
د ملګرو ملتونو د خوړو نړۍوال پروګرام مرستیال اجراییوي مشر کارل سکاو دا هم ویلي، چې په نړۍ کې ۳۲۰ میلیونه خلک د خوراکي توکو له سخت کمښت سره مخ دي او د دغه سازمان بودیجه شاوخوا ۴۰ سلنه کمه شوې ده.
د هغه په وینا، د خوړو نړۍوال پروګرام سږکال د مالي سرچینو د دې سخت کمښت له امله اړ شوی چې خپل شاوخوا ۵ زره کارکوونکي له دندو ګوښه کړي.
