ترکيې د فراه په روغتون کې د ماشومانو د جدي پاملرنې څانګه پرانیسته

د ترکیې د اناتولي خبري اژانس راپور ورکړی، چې د ترکیې د همکارۍ او همغږۍ ادارې (تیکا) فراه ولایتي روغتون کې د ماشومانو لپاره د ځانګړې پاملرنې څانګه جوړه کړې ده.

د اناتولي د راپور له مخې؛ تیکا زیاته کړې چې په فراه کې د طبي وسایلو کمښت د ناروغ ماشومانو ژوند له خطر سره مخامخ کړی دی.

د اناتولي خبري اژانس د سې شنبې په ورځ (د وږي ۱۴مه) راپور ورکړ، چې د ماشومانو د ځانګړې پاملرنې څانګه د تیکا په همکارۍ فعالیت کوي.

په راپور کې د تیکا د چارواکو په حواله ویل شوي، چې د فراه په دولتي روغتون کې د ماشومانو د ځانګړې پاملرنې نشتوالی د دې لامل شوی و، چې ناروغان نورو ولایتونو ته ولیږدول شي.

د تيکا مسوولين وايي، چې له فراه څخه نورو ولايتونو ته د ناروغانو لېږدول ستونزمن وو او تېر کال نېږدې سل ماشومان روغتون ته پر لاره کې مړه شول.

د ترکيې د همکارۍ او همغږۍ اداره وايي، د دې ستونزې د حل په موخه يې د ماشومانو د ځانګړې پاملرنې څانګې ته د رنګه ايکسري پرنټر، د زړه د نوار واحد، د سونوګرافۍ دستګاه، د تنفسي دستګاه، برقي شاک، سکرین، د نوي زېږیدلي ماشوم د ساتنې دستګاه او نورې پرمختللې ټېکنالوژۍ مرسته کړې ده.

وروسته له هغه چې طالبان واک ته ورسېدل او بیا یې د ښځو پر کار کولو بندیز ولګاوه، افغانستان د بشري ځواک، طبي وسایلو او پرمختللې ټېکنالوژۍ له کمښت سره مخ شوی دی.