د چین لومړی وزیر لي کیانګ وايي د هېوادونو ترمنځ جنجال کې د ښکېلتیا پر مهال مهمه دا ده چې د «نوې سړې جګړې» مخه ونیول شي. نوموړي د چارشنبې په ورځ دا خبره په انډونیزیا کې د اسیان سرمشریزه کې وکړه.
هغه د سوېل ختیځې اسیا یا اسیان او چین، جاپان او سوېلي کوریا غونډه کې زیاته کړه، «هېوادونو ته پکار دي چې اختلافونو او لانجو ته په مناسب ډول رسیدګي وکړي.»
د هغه په خبره، «په دغسې حالاتو کې تر ټولو مهمه دا ده چې پلوي ونه شي، بلاکونه جوړ نه شي او د نوې سړې جګړې مخه ونیول شي».
خو د انډونیزیا پلازمېنه جکارټا کې د دې سرمشریز د ایجنډا مهمه برخه هم په سوېلي چین سمندرګي کې د چین زیاتېدونکې یرغلیزې چارې دي.
د دغې مهمې سوداګریزې لارې پر ځینې برخو د اسیان څو غړي هېوادونه هم د ملکیت دعوه لري.
دا اونۍ چین د سوېلي چین سمندرګي نوې نقشه هم خپره کړه چې پکې یې د خپل حاکمیت سیمه پراخه کړې ده.
د اسیان څو غړو هېوادونو دا نقشه وغندله.
