د ایران ولسمشر د چهارشنبې په ورځ د ( وږي په ۱۵مه) په سویلي خراسان کې د یوې غونډې پرمهال له افغانستان سره د ایران د اقتصادي اړیکو د پراختیا غوښتنه کړې.
ابراهیم رییسي ویلي:« هغه خنډونه چې له افغانستان سره راکړه ورکړه نه غواړي، باید لرې شي.»
د ایراني رسنیو د راپورونو له مخې، هغه د ایران او افغانستان ترمنځ د سوداګریزو توکو راکړه ورکړه د دواړو هېوادونو لپاره یو فرصت ګڼلی او ویلي یې دي:« د دواړو لوریو لپاره د فرصت یوه پوله ده.»
هغه د سرحدي کوچنیو بازارونو فعالېدو ته په اشارې، د سویلي خراسان والي او ایراني چارواکو ته سپارښتنه کړې، چې فرصت له لاسه ورنه کړي.
په همدې حال کې ابراهیم رییسي ټینګار کړی، چې د ایران دولت باید د کانونو په برخه کې د خصوصي برخې له پاره لار پرانیزي.
ایران هم د نورو هېوادونو په څېر تراوسه پورې یې طالبان په رسمیت نه دي پېژندلي، له دې سره دغه هېواد د افغانستان په سفارت کې یې د طالبانو ډیپلوماټان منلي او له طالبانو سره اقتصادي اړیکې هم لري.
د روان کال په چنګاښ میاشت کې د ایران ګمرک اعلان کړی و، چې د طالبانو له بیا واکمنېدو وروسته د دواړو هېوادونو ترمنځ د سوداګرۍ ارزښت ۱.۶ ملیونه ډالرو ته رسیدلی و.