د پیسو نړۍوال صندوق په یوه نوي راپور کې ویلي، چې په سعودي عربستان کې د اقتصادي ودې د کمېدو له وړاندوېنې سره - سره په دغه هېواد کې د بېکارۍ کچه له ۹ څخه ۴،۸ سلنې ته راټیټه شوې ده.
دې ادارې ویلي، چې د عربستان د ورو اقتصادي ودې علت د تېلو د تولید د کمښت له مله دی.
په دغه راپور کې چې د چهارشنبې په ورځ خپور شو، ویل شوي چې سعودي عربستان تېر کال د شلو پراختیایي هېوادونو په ډله کې تر ټولو چټکه اقتصادي وده درلوده.
د دغه راپور له مخې؛ سعودي عربستان تېر کال د تېلو د بیو د ناڅاپي لوړېدو له امله ۸،۷ سلنه اقتصادي وده درلوده، چې دا لومړی ځل و چې دغه هېواد د دولتي بودجې منفي کسر ولید.
سږکال اټکل کیږي، چې دا شمېره به ۱،۹ سلنې ته راښکته شي. د پیسو نړۍوال صندوق ویلي، چې اقتصادي کمښت د تولیداتو د کمښت سربېره د تیلو د بیو د راټیټېدو سره هم تړاو لري، چې د کوویډ-۱۹ د بندیزونو له لرې کېدو او د اوکراین د جګړې له پیلېدو وروسته په بې ساري ډول لوړ شو.
سعودي عربستان او روسیې د پنجشنبې په ورځ اعلان وکړ، چې د روان کال تر پایه به د تولید کمولو ته دوام ورکړي. سعودي عربستان ویلي دي، چې دا اقدام د بیو د ثبات او د تېلو د بازار د ثبات لپاره اړین دی.
د تېلو په برخه کې لکه سیاحت او سپورت کې د سعودي پانګونه ګټوره ده. د پیسو نړۍوال صندوق وړاندوینه کړې، چې سږکال به په سعودي عربستان کې د غیر نفتي خدمات او صنایع نېږدې 5 سلنه وده وکړي.
رویټرز لیکي، چې په حکومتولۍ کې اصلاحاتو او په نویو سکټورونو کې د خصوصي پانګونې ودې د تېلو د دغه بډایه هېواد د غیر نفتي عاید زیات کړی دی.
دا وده د سعودي ولیعهد محمد بن سلمان د «د ۲۰۳۰ میلادي کال لرلید» پروګرام یوه برخه ده چې ژمنه یې کړې وه، چې د میلیاردونو ډالرو په پانګونې سره به د سعودي اقتصاد بدل او متنوع کړي.
