د طالبانو د بهرنیو چارو وزیر د ټولګډونه حکومت پلویانو ته په اشارې سره ویلي، چې دوی په همدې «پلمه» د طالبانو حکومت په لاره کې خنډونه جوړوي. امیرخان متقي زیاته کړه، چې تر اوسه د ټولګډونه حکومت تعریف او یا کومه بېلګه نه ده وړاندې شوې.
د ښاغلي متقي څرګندونې د طالبانو د بهرنیو چارو وزارت د ویاند مرستیال احمدضیا تکل په ټویټر کې خپرې کړې دي.
هغه د پنجشنبې په ورځ (وږي ۱۶مه) د امیرخان متقي له خولې لیکلي دي: «په تیرو شلو کلونو کې اشغالګرو هغه افغانان شهیدان او بندیان کړل چې د ترهګرۍ په نوم یې د اشغال مخالفت کاوه.»
د طالبانو د بهرنیو چارو وزیر ویلي چې تر اوسه د ترهګرۍ او ټولګډونه حکومت کوم مشخص تعریف او بېلګه نه ده وړاندې شوې.
څرګنده نه ده چې ښاغلي متقي دا خبرې چیرته کړې دي.
په تېرو دوو کلونو کې طالبانو د یوه پراخ بنسټه حکومت د جوړولو په برخه کې د نړیوالې ټولنې او ګاونډیو هېوادونو بیا، بیا غوښتنو ته غاړه نه ده ایښې.
تر اوسه پورې یوه هېواد هم د دغې ډلې حکومت په رسمیت نه دی پېژندلی، د یوه پراخ بنسټه حکومت جوړول او د بشري حقونو ته درناوی په دې برخه کې د نړۍ والې ټولنې له بنسټیزو شرطونو څخه دي.
تر دې مخکې امیر خان متقي د ایران پر اسلامي جمهوریت له دې امله نیوکې کړې وې چې ايران په افغانستان کې د ټولګډنه حکومت پر جوړویدو ټینګار کړی. هغه پرته له دې چې د ايران نوم واخلي، په خندا سره یې ویلي و: «څومره خلک چې تاسو يې يوازې اعداموئ، موږ يې په زندانونو کې نه لرو.» متقي زیاته کړه: «ایا تاسو ټولګډونه حکومت لرئ؟»
د ایران د بهرنیو چارو وزارت مرستیال رسول موسوي د متقي د څرګندونو په غبرګون ویلي، دغه ډله دې له خپلو نړۍ والو مسوولیتونو څخه نه تښتي. نوموړي په ټوېټر لیکلي: «سوله، ټيکاؤ، امنیت او تلپاتې پراختیا په افغانستان کې د یوه ټولګډونه حکومت په رامنځته کېدو کې نغښتې.»
ښاغلي موسوي زیاته کړه چې د ټولګډونه حکومت جوړول د امنیت شورا د ۲۵۱۳ او ۲۵۹۳ پریکړه لیکونو او د افغانستان د ګاونډیو هیوادونو ایران، پاکستان، چین او ترکمنستان د بهرنیو چارو د وزیرانو د غونډو د اجماع موضوع وه.