په شمالي وزیرستان کې پر یوه موټر بمي چاودنې ۲۶ کسانو ته مرګژوبله اړولې
تېره ورځ په شمالي وزیرستان کې پر یو موټر د بمي چاودنې له امله ۲۶ کسانو ته مرګ ژوبله اوښتې. په سیمه کې پولیس چارواکي وایي، چې پرون د شوال په سیمه کې پر یو موټر د سړک غاړې یو ماین چاودلی چې له امله یې یو تن مړ او ۲۵ تنه نور ژوبلیدلي دي.
د پېښې ټول قربانیان کارګر مزدوران وو، چې سیمې ته د ځڼغوزو د راټولولو لپاره روان وو.
په پېښه کې د ټپیانو درملنه روانه ده او روغتیایي حالت یې هم د ډاډ وړ ښودل شوی.
تر دې وړاندې د اګست په ۱۹مه نېټه هم شوال ګل میر کوټ سیمه کې د کارګرو مزدورانو یو موټر په بم الوتی و، چې له امله یې یوولس تنه کارګران وژل شوي او دوه تنه نور یې ټپیان شوي وو.
دوه ورځې وړاندې هم د سېپتمبر په پنځمه د شمالي وزیرستان ګړیوم کلي کې پر یو کور د یو توغندي د لګېدو له کبله د کور یوه مېرمن او د هغې څلور بچيان وژل شوي وو او دوه تنه نور ماشومان هم ژوبل شوي وو.
شمالي وزیرستان په دې وروستیو کې یو ځلې بیا د وسلهوالو او هدفي بریدونو شاهد دی او تر څنګ یې د پاکستاني پوځیانو او وسلهوالو ډلو تر منځ هم نښتو زور اخیستی.
روان کال په شمالي وزیرستان کې ۳۶ هدفي بریدونه شوي، چې تر ۴۰ زیات مشران، مخه ور ځوانان، دولتي چارواکي، سیاسي او مدني فغالان په کې یا وژل شوي او یا هم ژوبل شوي دي.
