پاکستانۍ شبکې ډان نیوز د ځینو سرچینو په حواله ویلي، چې د پاکستان موقت حکومت یوه لایحه تصویب کړې چې له مخې به یې هغه افغانان چې له پاکستانه د وتلو اسناد نه لري، د ۸۰۰ ډالرو په بدل کې به ورته د وتلو پاڼه ورکړل شي.
ویل کېږي، چې دغه سند د روان میلادي کال تر پایه د اعتبار وړ دی.
دغه پرېکړه تر اوسه د پاکستان د حکومت لهخوا په رسمي توګه نهده اعلان شوې.
له دې سره، په اسلام اباد کې د افغانستان انټرنشنل سرچینو زی کړې ده، چې د دغې پرېکړې له مخې هغه افغانان چې پاکستان ته په ناقانونه توګه راغلي او یا یې د ویزې موده پای ته رسېدلې، باید له دغه هېواده د وتلو لپاره ۸۰۰ ډالره جرمانه پرې کړي.
دغو سرچینو همدزیاته کړې، چې افغانان باید د وتلو د کارټ د ترلاسه کولو د چارو د بشپړولو لپاره هم ۳۰ ډالره ورکړي.
پر افغانستان د طالبانو له واکمنۍ وروسته د پاکستان د ویزو ترلاسه کول د افغانانو لپاره په یوې جدي ستونزې بدله شوې ده.
د سرچينې د مالوماتو له مخې، اوس مهال په تور بازار کې د پاکستان ويزه له زرو څخه تر ١٥٠٠ ډالرو پورې پلورل کېږي.
خو د دغو کسانو په خبره، د ویزې د اعتبار موده له یوه کال څخه شپږو میاشتو ته راکمولو د هغو کسانو لپاره ستونزې جوړې کړي چې د طالبانو له وېرې له افغانستانه وتلي دي.
د سرچینو په وینا، د پاکستان حکومت ډېر ځله د ویزې د مودې له غځولو ډډه کوي او دا د دې لامل کیږي چې یو لوی شمیر ویزه لرونکي کسان چې د ویزو موده یې پایته رسیدلې، بې اسناده پاتې شي او دوی له پاکستانه د وتلو لپاره باید ډیرې پیسې ورکړي.
د دې ترڅنګ یو زیات شمېر افغانان د ځینو بهرنیو هېوادونو ویزې لري، خو د پاکستان حکومت ورته د وتلو اجازه نه ورکوي.
له دې سره، یو شمېر هغه افغانان بیا چې له اروپا څخه پاکستان ته د خپلو کورنیو او ملګرو د لیدلو لپاره تللي وايي، له پاکستانه د وتلو پر مهال له ستونزو سره مخ شوي دي.
پاکستان په تېرو دوو کلونو کې په افغانستان کې د طالبانو له واکمنۍ وروسته له افغان کډوالو سره جدي چلند کوي.
د عيني شاهدانو په وينا، پاکستاني پوليس په زور د ځینو کډوالو کورونو ته ننوځي او ډېری يې په داسې حال کې نيولي، چې پاسپورټونه او د پاکستان ويزې يې هم له ځانه سره لرلې.
د طالبانو سرحدي چارواکي هم وخت په وخت له پاکستانه د افغان کډوالو د یوې ډلې د راتګ او یا هم د دغې ډلې په هڅو په پاکستان کې د افغان بندیانو د خوشي کیدو خبر ورکوي.
پاکستان په تېرو څو لسیزو کې د افغان کډوالو د یوې لویې برخې کوربه دی او په تېرو دوو کلونو کې په زیات شمېر حکومتي غړي، مدني فعالان او عام خلک دغه هیواد ته کډوال شوي دي.