د افغانستان د استازولۍ د برخلیک په اړه د ملګرو ملتونو د پرېکړې په درشل کې، طالبانو د دې څوکۍ د خپلولو لپاره هڅې چټکې کړې دي. په قطر کې د طالبانو د سیاسي دفتر مشر وايي، د دوی د مشر د حکم له مخې هڅه کوي چې د دې ډلې حکومت په رسمیت وپیژندل شي.
په پام کې ده چې د ملګرو ملتونو د باورلیک کمېټه په نږدې راتلونکي کې په دغه سازمان کې د افغانستان د څوکۍ د برخلیک په اړه غونډه وکړي.
دغې کمېټې تر دې مخکې طالبانو ته د دې څوکۍ له سپارلو ډډه کړې ده.
دا مهال د افغانستان د پخواني حکومت استازی نصیر احمد فایق په ملګرو ملتونو کې د افغانستان استازیتوب کوي.
سهیل شاهین د طالبانو تر مدیریت لاندې د افغانستان ملي راډیو ټلوېزیون سره په مرکه کې ویلي، چې د بېلابېلو هېوادونو له استازو سره یې لیدلي او طالبان هڅه کوي له نړیوالې ټولنې سره ښې اړیکې ولري.
په قطر کې د طالبانو د سیاسي دفتر مشر د کوم ځانګړي هېواد نوم نه دی اخیستی، خو زیاته کړې یې ده، چې د ډېرو اروپايي، عربي او اسیايي هېوادونو له چارواکو سره یې کتلي دي.
هغه چې په ملګرو ملتونو کې د افغانستان څوکۍ ته د طالبانو نوماند دی ویلي، چې د دې هېوادونو له استازو سره په لیدنه کې پر « هغو مهمو مسلو خبرې کړې» چې دا ډله ور سره مخ ده.
سهل شاهین د دغو خبرو جزئیات ورنه کړل، خو نړیوالې ټولنې په وار وار له طالبانو غوښتي چې یو ټول شموله حکومت جوړ کړي او پر ښځو او نجونو بندیزونه لرې کړي.
تر اوسه کوم هېواد طالبان په رسمیت نه دي پیژندلي.
