سیمهییزو سرچینو افغانستان انټرنشنل ته خبر ورکړی، چې طالبانو په بدخشان ولایت کې د بهارستان عالي لېسې ښوونکی ضیا ساخا او د جمعیت اسلامي ګوند قومندان عبدالاحمد یفتلي نیولي دي.
طالبانو لا په دې اړه څه نهدي ویلي.
سرچینې وایي، طالبانو د بدخشان د بهارستان عالي لېسې ښوونکی د «سلفي توب» په تور نیولی.
خو دغو سرچینو دا هم ویلي، چې ضیا ساخا له شلو کلونو راهیسې په بهارستان لېسه کې تدریس کاوه او له هیڅ یو بهیر سره یې اړیکې نه درلودې.
افغانستان انټرنشنل ته د رارسېدلیو مالوماتو له مخې، عبدالاحمد یفتلي درې ورځې وړاندې نیول شوی دی.
سرچینو ویلي، له نیول کېدو وروسته د هغه د برخلیک په اړه هېڅ مالومات په لاس کې نشته.
طالبان واک ته تر رسېدو وروسته، د ځينو سیاسي ډلو او جبهو په ځانګړې توګه د ملي مقاومت جبهې سره د همکارۍ په تور خپل مخالفین نیسي.
د رواداري په نوم د بشري حقونو یو بنسټ په ۱۴۰۱ کال کې اعلان وکړ، چې طالبانو په تېرو پنځلسو میاشتو کې لږ تر لږه ۱۹۷۶ کسان په ۲۹ ولایتونو کې په «خپلسري او ناقانونه» توګه نیولي دي.
