میانمار له روسیې څخه دوه سوخو ۳۰ ډوله جنګي جټ الوتکې ترلاسه کړې

AP ۱۴۰۲ وږی ۱۹

د میانمار د سوداګرۍ وزیر چارلي تان وايي، دغه هېواد د روسیې د دوو سوخو ۳۰ جنګي جټ الوتکو لومړۍ چوپه ترلاسه کړه.

روسیې او میانمار د شپږو سوخو ۳۰ اېس اېم اس ډوله جنګي جټ الوتکو د معاملې تړون د ۲۰۲۲ کال په سپټمبر کې لاسلیک کړ.

د میانمار د سوداګرۍ وزیر د یکشنبې په ورځ د روسیې په ولادیوستوک بندر کې د ختیځ اقتصادي فورم په څنډه کې د روسیې ریانووستی اژانس ته د الوتکو د لېږد په هکله خبره کړې ده.

د روسیې د دولتي کنټرول لاندې د وسلو صادرونکي روسوبورون په وینا، سوخو ۳۰ اېس اېم اېس ډوله جنګي جټ الوتکه د دښمن هوايي اهداف په نښه کولو، هوايي څار او د پیلوټ د روزنې لپاره ډیزاین شوې ده.

د میانمار د سوداګر وزیر د روسیې د تاس دولتي خبري اژانس ته وویل چې په ختیځ اقتصادي فورم کې به د دواړو هیوادونو ترمنځ د سیاحت د پراختیا په ګډون یو شمیر دوه اړخیز تړونونه لاسلیک شي.

د روسیې دفاع وزارت د رویټرز د غوښتنې سره سره د دې راپور په اړه کوم غبرګون ونښود.

د امریکا متحده ایالاتو خبرداری ورکړی چې د میانمار له پوځي واکمنانو سره د روسیې ملاتړ ورته د منلو نه دی او د وسلو استول د جګړې اور ته لمن وهي چې دغه هېواد یې په ناورین بدل کړی دی.

د روسیې د دفاع وزیر او لوړپوړي ډیپلوماټ میانمار ته په داسې حال کې سفر کړی، چې د جنتا مشر مین انګ هیلینګ له ۲۰۲۱ کال راهیسې څو ځلې روسیې ته تللی او دغه هېواد افتخاري دوکتورا ورکړې ده.

نور خبرونه

رادیو