یوې باوري سرچینې افغانستان انټرنشنل ته تایید کړې، چې طالبانو د یکشنبې په ورځ (د وږي ۱۹مه) په پروان ولایت کې د ولسمشرۍ ماڼۍ پخوانی ساتونکی محمد حمزه مجددي نیولی دی.
نوموړی د ولسمشر غني د واکمنۍ پر مهال د ولسمشرۍ ماڼۍ د (پي پي ایس) غړی و او د جمهوریت تر وروستۍ ورځې یې دنده سرته رسوله.
طالبانو تر اوسه د دغه پخواني سرتيري د نيولو په اړه څه نه دي ويلي.
دغو سرچینو ویلي، چې ښاغلی مجدي د پروان ولایت د خواجه سیاران په کلي کې نیول شوی دی.
نوموړی د عبدالطیف مجددي زوی دی، چې په تېر جمهوري حکومت کې د پروان د ملي امنیت ریاست د تحقیقاتو مرستیال و.
په افغانستان کې د ملګرو ملتونو ماموریت (یوناما) شاوخوا یوه میاشت وړاندې په یوه راپور کې لیکلي وو، چې طالبانو په کابل او پنجشیر کې د پخوانیو پوځیانو نیولو ته دوام ورکړی.
یوناما ویلي، طالبانو په بېلابېلو ولایتونو کې د تېر حکومت مامورین او سرتېري نیولي، شکنجه کړي او وژلي دي.
له دې وړاندې هم د پي پي ایس څو سرتېري په انفرادي بڼه نیول شوي او ځینې یې لا هم بندیان دي.