د پاکستان د بهرنیو چارو وزارت د تورخم د بندیدو په اړه د طالبانو د بهرنیو چارو وزارت د تیرې ورځې اعلامیه د حیرانتیا وړ بللې ده، او وايي د طالبانو سرپرست حکومت د تورخم د لنډمهالي بندیدو په لاملونو ښه پوهیږي.
په اعلامیه کې ویل شوي، د پاکستان حکومت پر خپله خاوره د بل چا هیڅ ډول لاسوهنه نه شي زغملی ځکه په دې سره د پاکستان حاکمیت تر پوښتنې لاندې راځي.
همدارنګه په دغه اعلامیه کې ویل شوي:«کله چې مو د سپټمبر په ۶مه د طالبانو له لوري د غیرې قانوني ابادیو د جوړدولو مخه ونیوله د طالبانو له لوري د یوه سولیز هوډ پر ځای د پاکستاني پوځیانو پوستې په نښه شوې، په تورخم کې یې زیربناوې زیانمنې کړې او د پاکستان او افغان ولسي وګړو ژوند یې په خطر کې واچاوه»
د پاکستان د بهرنیو چارو وزارت وايي، د دغه هیواد پر سرحدي پوستو دا ډول بې دلیله او بې توپیره ډزې په هیڅ صورت د توجیه وړ نه دي. او د طالبانو له لوري بې دلیله ډزې د ترهګر زړور کوي.
پاکستان په دغه اعلامیه کې یو ځل بیا په افغانستان کې د ترهګرو ډلو د پټنځاینو په شتون ټینګار کړی.
موږ تل هیله لرلې ده چې له افغانستان سره پوله د دواړو هیوادونو تر منځ د سولې او دوستۍ پوله وي.
موږ له لسیزو راهیسې پاکستان ته د خپلو افغان وروڼو او خویندو ښه راغلاست په خلاصه غیږ کړی دی.
د افغانستان او پاکستان پر پوله د طالبانو له لوري د پرلپسي غیرې ضروري پارونو په مقابل کې پاکستان له زغم څخه کار اخیستی او تل خبرو ته لومړیتوب ورکوي. د تورخم لنډ مهاله بندول د سختو قضیو پر مهال کیږي، لکه د ۶ سپټمبر پیښه او یا هم د افغانستان خاوره په پاکستان کې دننه د بریدونو لپاره د کارولو پر مهال .
د دغه اعلامیې په یوه برخه کې د طالبانو د بهرنیو چارو وزارت د تیرې ورځې اعلامیې ته هم غبرګون ښودلی، وايي، په یاده اعلامیه کې د پاکستان د اقتصادې او بهرنۍ سوداګرۍ په اړه ځینې بې بنسټه څرګندونې شاملي وي.
پاکستان چمتو دی چې د رغنده خبرو اترو له لارې ټولې دوه اړخیزي مسلې او اندیښنې حل کړي چې د دواړو هیوادونو اقتصادي اړیکېلا پیاوړې شي.
په دغه اعلامیه کې له طالبانو غوښتل شوي چې د پاکستان اندېښنې په پام کې ونیسې، د پاکستان د ځمکنۍ بشپړتیا ته دروناوی وکړي او د ډاډ فضا رامنځته کړي چې د افغانستان خاوره د پاکستان پر ضد د تروریستي بریدونو لپاره نه کاریږي.
