د چین ځانګړي استازي د سعودي عربستان، پاکستان، قطر او طالبانو له چارواکو سره لیدلي
د افغانستان لپاره د چین ځانګړي استازي پاکستان، قطر او سعودي عربستان ته سفرونه کړي، چې د سفر موخه یې د افغانستان په اړه د دغو هېوادونو له چارواکو سره خبرې اترې دي.
د افغانستان لپاره د چین ځانګړي استازي پاکستان، قطر او سعودي عربستان ته سفرونه کړي، چې د سفر موخه یې د افغانستان په اړه د دغو هېوادونو له چارواکو سره خبرې اترې دي.
د چین د بهرنیو چارو وزارت وايي چې یوشیاویانګ د درې واړو هېوادونو د بهرنیو چارو وزارتونو له چارواکو، د اسلامي همکاریو د سازمان له چارواکو او د طالبانو له استازو سره د افغانستان په اړه خبرې اترې کړي دي.
د چين د بهرنيو چارو وزارت د اعلاميې له مخې؛ يو شياویانګ د وږي د میاشتې له ۸مې نېټې څخه تر ۱۷مې نېټې پورې د سعودي عربستان، قطر او پاکستان په بلنه له دغو هېوادونو څخه ليدنه وکړه.
د دې خبرپاڼې له مخې؛ چې د نن سې شنبه( د وږي ۲۱مه) خپره شوه، د چين ځانګړي استازي د پاکستان د بهرنيو چارو وزارت له مرستيال محمد سيروس سجاد قاضي او په قطر کې د طالبانو د سياسي دفتر له مشر سهيل شاهين سره وکتل.
د چین د بهرنیو چارو وزارت د قطر او سعودي عربستان د بهرنیو چارو د وزارتونو او د اسلامي همکاریو د سازمان د چارواکو د څرګندونو په اړه څه نه دي ویلي.
چین، پاکستان او قطر له طالبانو سره نېږدې اړیکې لري. دا مهال په درې واړو هېوادونو کې د افغانستان په سفارت کې د طالبانو ډېپلوماتان کار کوي.
