د شعیه ښوونکو د غیرحاضرۍ له امله د پاکستان د خېبر پښتونخوا په کورمه ایجنسۍ کې قومي مشرانو نېږدې ۳۰۰ دولتي ښوونځي د یوه اعتراض په دود تر نامعلومې نېټې پورې تړلي دي.
په کورمه کې د شعیه مذهبو ښوونکو د غیر حاضرۍ مساله د روان کال د می په میاشت کې د څلورو شعیه استادانو له وژلو وروسته راپورته شوه.
له دې پېښې وروسته نېږدې ۲۰۰ شعیه استادانو سني مېشتو ښوونځیو ته له ورتګه انکار وکړ، چې په ګڼو ښوونځیو کې یې تعلیمي بهیر ټکنی کړ.
د کورمې قومي مشرانو د ښوونځیو له تړلو وروسته ویلي، که چېرې څوک په خپل سر دغه تړلي ښوونځي پرانیزي نو د قومي تړو او جرګو پر بنسټ به ورسره چلند کیږي.
دوی له صوبايي حکومته غواړي، چې د دوی ښوونځیو ته دې پام وکړي او رامنځته شوې کشاله دې حل کړي.
قومي مشر حاجي زمان کورمه وال افغانستان انټرنشنل- پښتو ته وویل، چې د کوزې او منځنۍ کورمې ښوونځیو تش په نوم فعالیت کاوه.
هغه زیاته کړه: “ریاست په زوره زموږ سکولونه(ښوونځي) کمزوري کوي، د شعیه استادانو د نه راتګ میاشتې وشوې، خو حکومت ورته هېڅ پام ورته نه کوي، زموږ اولادونه دوی په زور له تعلیمه بې برخې کوي نو ځکه مو ښوونځي وتړل”.
د نوموړي په خبره، چې په منځنۍ او کوزه کورمه کې داسې ښوونځي هم وو، چې ښوونکي یې په میاشتو – میاشتو خپلې دندې ته نه حاضریږي.
بل خوا پاکستاني رسنیو د منځنۍ کورمې د یوه چارواکي احسان الله احسان په حواله ویلي، چې دوی هڅه کوي دغه ستونزه ژر تر ژره حل کړي.
ښاغلي احسان زیاته کړې، چې دوی به د قومي مشرانو سره ګډې ناستې ولري او یاده ستونزه به د دخیلو غاړو په تفاهم سره حل کړي.
د یادونې وړ ده، چې د خېبر پښتونخوا په کورمه کې سني او شعیه مذهبي اوسي، چې وخت ناوخت یې تر منځ د مذهبي اختلافاتو له امله نښتې رامنځته کیږي.