د طالبانو د بامیانو والي: په بند امیر کې د ښځو لپاره ځانګړی ځای جوړوو
په بامیانو کې د طالبانو والي ویلي، چې دغه ډله به راتلونکی کال په بند امیر کې د ښځو لپاره ځانګړی ځای جوړ کړي.
په بامیانو کې د طالبانو والي ویلي، چې دغه ډله به راتلونکی کال په بند امیر کې د ښځو لپاره ځانګړی ځای جوړ کړي.
عبدالله سرحدي د طالبانو تر کنټرول لاندې ملي ټلویزیون سره په مرکه کې دې پارک ته د ښځو د ننوتو د بندیز په اړه وویل: «هغه ښځې چې بند امیر ته راتلې، بې حجابه وې».
په دې وروستیو کې د طالبانو د امر بالمعروف او نهی عن المنکر وزیر خالد حنفي اعلان وکړ، چې ښځې نه شي کولی بند امیر ته سفر وکړي.
په دې مرکه کې د بامیانو والي ټینګار وکړ، چې د بامیانو ښځې «بې حجابه نه دي» او زیاته یې کړه، چې دا پرېکړه یې د بامیانو د خلکو په غوښتنه کړې.
د عبدالله سرحدی په وینا؛ د ښځو لپاره کوم ځانګړی ځای چې په پام کې نیولو شوی دی، هر څه به یې «ښځینه» وي.
هغه زياته کړه، چې د دې ځاى لپاره به ښځینه پوليس او کارکونکي وګومارل شي، څو ښځې بند امیر ته دننه شي.
د طالبانو د امر بالمعروف او نهی عن المنکر وزیر محمد خالد حنفي بامیانو ته د سفر پر مهال ویلي و، چې ښځې دې سفر وکړي، «خو سفر نه فرض دی او نه هم واجب».
د طالبانو د امر بالمعروف او نهی عن المنکر وزیر دغه امر د افغانستان په دننه او بهر کې سختې نیوکې راپارولې او د ښځو د ژوند د محدودولو لپاره یې د طالبانو د تګلارې یوه برخه وګنله.
