په تازه پېښو کې د شمالي وزیرستان میرانشاه ولسوالۍ په خیسور سیمه کې د یوه کالج پخوانی مشر خان دراز وزیر د نامعلومو وسلوالو په ډزو وژل شوی. په باړه، باجوړ، اورکزیو او میرعلي کې هم د هدفي وژنو او امنيتي پېښو په پایله کې ولسي خلک وژل شوي دي.
د یوه بل خبر له مخې د خيرپښتونخوا باړې ولسوالۍ په شانکوبار قمرخيل سیمه کې د جان محمد په نوم یو تن د نامعلومو موټرسایکل سپرو به ډزو وژل شوی.
د دواړو پېښو ترسره کوونکي مخ پټي وسلوال له سېمې بېرته تښتيدلي دي.
تر اوسه پورې د دغو دوو تنو د وژلو په اړه کومې وسلوالې ډلې څه نه دي ویلي، او نه هم د دغو وژنو لامل معلوم دی.
په سیمه کې ازاد خبریال لال وزیر وايي چې روانه اوونۍ په خيبر پښتونخوا کې هدفي وژنې او د نا امنيو پېښې ډیرې شوې دي.
لال وزیر وړاندې وايي: «دوه ورځې مخکې په اورکزئ ایجنسۍ کې يو کس د سړک غاړې په ماين چاودنه کې ووژل شو، په میرعلي کې د وسلوالو او امنيتي ځواکونو تر منځ په جګړه کې یوه ښځه او سړی ووژل شول او همدا دوه ورځې مخکې نا څرګندو وسلوالو په باجوړ کې يو کس په ډزو وواژه»
په دې وروستیو کې د خيبر پښتونخوا په بیلابېلو سیمو کې د نا امنۍ پېښې زیاتې شوې چې له امله يې په هدفي وژنو او جګړې پر مهال ولسي خلکو ته مرګژوبله اوړي.
په امنيتي ځواکونو باندې د بریدونو مسولیت له معمول سره سم د ټي ټي پي وسلواله ډله په غاړه اخلي خو په سیمه کې د ولسي خلکو هدفي وژنې لا هم د پخوا په څېر نامعلومې دي.
