عبدالله عبدالله له اوږدې مودې وروسته کابل ته راستون شو
د افغانستان د ملي مصالحې د عالي شورا پخواني مشر عبدالله عبدالله د پنجشنبې په ورځ (د وږي په ٢٣مه) اعلان وکړ، چې په کابل کې یې د ترکيې له سفير او له حامد کرزي سره وکتل. ښاغلی عبدالله چې شاوخوا درې میاشتې وړاندې هند ته تللی و؛ بېرته کابل ته راستون شوی دی.
عبدالله عبدالله یو له هغو څو سیاسي څېرو څخه دی، چې د تېر حکومت له ړنګېدو وروسته په کابل کې پاتې شوی دی.
که څه هم د ۱۴۰۰ لمریز کال په حوت میاشت کې پر عبدالله عبدالله او پخواني ولسمشر حامد کرزي د سفر بندیز لګېدلی وه، خو له څه مودې وروسته دغه سفري بندیز یو څه کم شوی دی.
ښاغلی عبدالله د طالبانو د واکمنۍ په وروستیو دوو کلونو کې څو ځلې له افغانستانه وتلی او بېرته راستون شوی دی.
د راپورونو له مخې؛ د ښاغلي عبدالله کورنۍ په هند کې ده او د کورنۍ د لیدو لپاره وخت په وخت ورځي.
په دې وروستیو کې د ښاغلي عبدالله د اوږدې مودې نه شتون او د هغه راستنېدل په داسې حال کې ترسره کیږي، چې طالبانو د حامد کرزي په ګډون د سیاسي شخصیتونو په سفرونو او لیدنو محدودیتونه ډېر کړي.
څه موده وړاندې طالبانو د «امنیت د تامین» په پلمه له بهرنیو چارواکو سره د ښاغلي کرزي پر ملاقاتونو بندیز ولګاوه.
بل خوا د افغانستان پخواني ولسمشر ته نېږدې سرچینو تایید کړې، چې طالبانو په تېرو اوونیو کې ایران، جرمني او چین ته د حامد کرزي د درېیو سفرونو مخه نیولې ده.
ښاغلي عبدالله کابل ته له راستنېدو وروسته پر اېکس ټولنیزې شبکې (ټوېټر) کې په یوه یادښت کې لیکلي، چې په افغانستان کې د ترکیې له سفیر جهاد ارګینای سره یې د خدای پامانۍ ملاقات کړی دی.
عبدالله عبدالله د ترکیې د سفیر د ډېپلوماتیکو فعالیتونو ستاینه کړې ده.
