د پاکستان د بهرنیو چارو وزارت ویاندې یو ځل بیا ادعا وکړه چې د چترال په ګډون د دغه هېواد پر نورو سیمو هم له افغانستان بریدونه شوي دي. ممتاز زهرا بلوڅ له طالبانو وغوښتل چې د پاکستان پرضد د افغان خاورې د کارېدو مخنیوی باوري کړي.
مېرمن بلوڅ د پنجشنبې په ورځ خبریالانو ته دا هم وویل، چې د طالبانو د حکومت د رسمیت پېژندلو په تړاو د پاکستان دریځ نه دی بدل شوی.
نهه ورځې وړاندې د پښتونخوا چترال کې پاکستاني طالبانو د پوځ په څو پوستو بریدونه کړي و، چې له امله يې څلور پوځيان او په مقابل کې ۱۲ وسلوال وژل شوي وو.
سرچينو نن افغانستان انټرنشنل ته ویلي چې په چترال کې جګړه درېدلې خو لا هم له لرې واټنه خال خال ډزې کيږي.
له هغه راهیسې دا دویم ځل دی چې ممتاز زهرا بلوڅ وايي دا بریدونه په افغانستان کې پلان شوي، خو افغان طالبان د اسلام اباد دا تورونه ردوي.
