په مراکش کې د خونړۍ زلزلې په پنځمه ورځ، ډېری زلزله ځپلي کلیوال د ځمکې ښوېدنې له وېرې او د لارو بندېدو له امله بند پاتې دي. د رسمي شمېرو له مخې تر دې دمه د ۲۹۰۱ کسانو مړینه او د ۵۵۳۰ کسانو ټپي کېدل تایید شوي دي.
د رویټرز خبري اژانس د راپور له مخې، د مراکش پوځ د ژوندي پاتې شویو کسانو د لټون او ژغورنې د عملیاتو او همدارنګه د مرستو رسولو مشري په غاړه اخیستې، چې په دې برخه کې مرستندویه سازمانونه هم ورسره همکاري کوي.
ویل شوي، چې په دغو عملیاتو کې د څلورو نورو هېوادونو د ژغورنې ډلې هم ورګډې شوې دي.
د مراکش پاچا محمد ششم د زلزلې په څلورمه ورځ په ټلویزیون کې لیدل شوی و، چې په روغتون کې یې د ټپیانو پوښتنه کوله.
ډېری هغه کسان چې کورونه یې ویجاړ شوي له سړې هوا او لوږې شکایت کوي.
په ډېرو کلیوالو سیمو کې د ټيټو ودانیزو معیارونو له امله خټین کورونه نړیدلي دي.
د رېښتر په کچه دغه ۶،۸ درجې زلزله په مراکش کې په تېرو شپږو لسیزو کې تر ټولو خونړۍ زلزله بلل شوې ده.
