دغه غونډه د خبریالانو د ملاتړ کوونکو نړۍوالو سازمانونو، په بېلابېلو هېوادونو کې د جلاوطنه خبریالانو په ګډون د Körber Stiftung له لوري د یو شمیر نورو نړیوالو بنسټونو Zeit Ebelin ,ECPMF په همکارۍ د جرمني په هامبورګ کې جوړه شوه.
په دغه دوه ورځنۍ غونډه کې د افغانستان، اوکراین، میانمار، ایران، ترکیې، بلاروس او روسیې د خبریالانو د ملاتړ کوونکو سازمانونو له خوا د بیان ازادۍ او د رسنیو او خبریالانو حالت و ارزول شو.
اقغان ژورنالیست لطف الله نجفی زاده په دغې غونډه کې د خبرو پرمهال د افغانستان له رسنیو او خبریالانو پر اوسني حالت اندېښنه څرګنده کړه او د خبریالانو د ملاتړو سازمانونو څخه یې وغوښتل چې دغې ستونزې ته بنسټيزه حل لاره ولټوي.
له دې سره د افغانستان د خبریالانو د ملاتړ سازمان مشر حامد عبیدي هم د وینا پرمهال وویل چې، دغه سازمان هڅه کوي چې د نړیوالو بنسټونو په همکارۍ سره د خبریالانو شته ستونزې هوارې کړي او د رسنیو، خبریالانو او د بیان د آزادۍ د حالت ښه کولو لپاره یې د خبریالانو د ملاتړو بنسټونو د همکارۍ غوښتنه هم وکړه.
په دغه پروګرام کې د خبریالانو د مسلکي کارونو د دوام لپاره د جلاوطنه خبریالانو پر ملاتړ هم ټینګار وشو.
د خبریالانو ملاتړو سازمانونو هم ژمنه وکړه چې له جلاوطنه خبریالانو سره به خپلو هر اړخیزو همکاریو ته دوام ورکړي.
دا په جلاوطنۍ کې د رسنیو پنځمه غونډه ده.
دغه غونډه په داسې حال کې ترسره کیږي چې سلګونه خبریالان هم په هېواد کې دننه، او هم په ایران، پاکستان او د سیمې یو شمیر نورو هېوادونو کې له بې برخلیکه حالت سره مخامخ دي.
په پاکستان کې مېشته افغان خبریاله نسرین شیرزاد بشیر وایي چې له نږدې دوو کلونو راهیسې د جلا وطنۍ سختې شپې او ورځې تیروي.
نوموړې د خبریالانو د ملاتړو سازمانو پر کړنو هم نیوکه وکړه او ويې ويل چې دغه سازمانونه د ریښتینو خبریالانو او هغو کسانو ترمنځ چې د خبریالانو په نامه اروپایي او امریکایي هېوادونو ته ورسیدل، توپير نه شي کولای.
له دې سره، ډیر شمېر خبریالان د ورته غونډو جوړیدل نمایشي بولي او وایي چې خیر یې رښتینو خبریالانو ته نه رسیږي.