د ترکیې د اناتولي اژانس د راپور له مخې، د دغه هېواد سمندري ځواکونو د چاناک کاله ولایت په ایواجېک سمندرګي کې ۵۴ افغان کډوال له ډوبېدو ژغورلي. د دغې رسنۍ د راپور له مخې، دغه کډوال له ژغورلو وروسته نیول شوي دي.
ویل کېږي، چې دغه نیول شوي افغانان ټول په یوې پلاسټیکي بېړۍ کې سپاره وو او غوښتل یې چې ، د اژې سمندرګي له لارې د یونان ټاپوګانو ته ځان ورسوي.
دغه راپور چې د جمعې په ورځ د ( وږي په ۲۴مه) خپور شوی په کې راغلي، چې دغه کډوال په ایواجېک سیمه کې د بهرنیو اتباعو د بېرته ستنولو مرکز ته لېږدول شوي دي.
په هغه تصویر کې چې د بېړۍ او د سپرو کسانو خپور شوی، ماشومان او ښځې هم په کې لیدل کېږي.
ترکیه اروپا ته د افغان کډوالو یوه مهمه لاره ده. پر افغانستان د طالبانو له بیا واکمنېدو وروسته، ډېری خلک اروپا ته د تګ لپاره د ایران له لارې ترکیې ته ځي. د دغو کسانو له ډلې ډېری یې مړه شوي هم دي.
ترکیې څو اونۍ وړاندې یوشمېر ناقانونه او بې اسناده افغانان نیولي او بېرته یې افغانستان ته ستانه کړي دي.
