ټي ټي پي خپلو قومندانانو ته ویلي چې خپلو لیکو ته افغانان جذب نه کړي
د پاکستان طالبانو تحریک په یوه لیک کې د دې ډلې نظامي کمېسونونو ته ویلي، چې افغانان خپلو لیکو ته جذب نه کړي. د دې ډلې مشرتابه خبرداری ور کړی چې د سرغړونې په صورت کې به قومندانانو ته سزا ور کړل شي. د پاکستاني طالبانو غورځنګ دا لیک پرون د سپټمبر پر ۱۴ خپور کړی دی.
په افغانستان کې د طالبانو واکمنېدو پسې پاکستاني طالبانو هم په پاکستان کې بریدونه ډېر کړل.
راپورونه وايي چې پاکستاني طالبانو ته له امریکا په افغانستان کې پاتې وسلې هم په لاس ورغلې دي.
د بلوچستان په ژوب کې پر پوځکوټ د پاکستاني طالبانو له برید وروسته د پاکستان پوځ وویل، چې په دې برید کې درې افغانان هم وو.
تر دې مخې هم د پوځ مشر عاصم منیر ویلي و چې افغانان د پاکستان ترهګریزو بریدونو کې لاس لري.
خو وروستیو کې سرچینو افغانستان انټرنشنل ته وویل، د طالبانو مشر ملا هبت الله اخوندزاده داسې فرمان لاسلیک کړی دی چې په پاکستان کې یې جنګ حرام بللی دی.
د سرچینو په خبره، طالبان د کورني غبرګون او اندېښنې له امله د دې فرمان عمومي کېدل نه غواړي.
اسلام اباد له طالبانو غوښتي چې د پاکستاني طالبانو او د هغوی د افغان ملاتړو د چارو د مخنیوي لپاره دا فرمان عمومي کړي.
د طالبانو دفاع وزیر ملا یعقوب هم تېر زمري میاشت کې په جلال اباد کې یوې غونډې ته وویل چې که څوک بهر ته د جهاد په نیت ځي دا جهاد نه دی، بلکې جنګ دی.
خو بیا بیا د پاکستان ولسي او پوځي چارواکي وايي چې په دغه هېواد کې بریدونه د افغانستان له خاورې پلانېږي، اما طالبان تل دا تورونه ردوي او وايي، هیچا ته اجازه نه ور کوي چې افغان خاوره د نورو پرضد وکاروي.
