ملګرو ملتونو په مراکش او لېبیا کې د سېلاب او زلزله ځپلو سره د نړۍوالو مرستو غوښتنه وکړه
په ليبيا او مراکش کې له دوو خونړيو پېښو وروسته د ملګرو ملتونو د سرمنشي مرستيال مارټين ګرېفټس له نړۍوالې ټولنې وغوښتل، چې له دغو دوو هېوادونو سره مرسته وکړي.
په ليبيا او مراکش کې له دوو خونړيو پېښو وروسته د ملګرو ملتونو د سرمنشي مرستيال مارټين ګرېفټس له نړۍوالې ټولنې وغوښتل، چې له دغو دوو هېوادونو سره مرسته وکړي.
ښاغلي ګرېفیټس دغه تراژیدي د طبیعي پېښو د اغېزو په اړه یو جدي خبرداری وباله او ټینګار یې وکړ، چې د قربانیانو لاس نیونه باید لومړیتوب ولري.
د ملګرو ملتونو دغه چارواکي په دغه هېوادونو کې اړمنو کسانو ته د رواني- ټولنيزو مرستو رسولو ته په اشارې سره وويل: "موږ اړ يو، چې سمو خلکو ته په سم وخت کې سمې مرستې برابرې کړو."
د بشري مرستو د همغږۍ لپاره د ملګرو ملتونو د سرمنشي مرستیال زیاته کړه، چې اوسمهال په دغو هېوادونو کې خلک د خوراکي توکو، سرپناه او روغتیا ساتنې لپاره پیوستون ته اړتیا لري.
په مراکش کې د وروستۍ زلزلې له امله څه باندې ۲۹۰۰ کسان مړه شوي، زرګونه نور ټپیان شوي او ګڼ نور لا تراوسه هم تري تم دي.
د دغه هېواد پاچا محمد ششم امر کړی، چې له اړمنو کسانو سره دې د مرستې په موخه یو میلیارډ مراکشي درهم چې له سل میلیونه ډالرو سره برابر دي، ورکړل شي.
په ورته وخت کې پر نوموړي نیوکه شوې، چې د زلزله ځپلو سره د پیوستون لپاره یې چندان حضور نه درلود.
نوموړی د وږي میاشتې په ۱۷ له زلزلې وروسته یوازې درې ځلې د خلکو منځ کې لیدل شوی دی.
همداشان اټکل کېږي، چې په لیبیا کې د وژونکي سېلابونو له امله شاوخوا پنځه زره کسان وژل شوي، چې له دې شمېر څخه په روغتونونو کې د ۳۸۶۰۰ کسانو مړینې ثبت شوي دي.
په لیبیا کې د ملګرو ملتونو سره تړلې یوې ادارې اټکل کړی، چې د دغه هېواد په سېلاب ځپلو سیمو کې چې سیاسي کړکېچ هم ورسره دی، شاوخوا ۳۸ زره او ۶۰۰ کسان بې کوره شوي دي.
