د جوزجان ولایت یو شمېر ځوانان چې په یوې غونډه کې راټول شوي وو، په هېواد کې یې د نجونو لپاره د ښوونیزو مرکزونو په تړل کېدا نیوکه وکړه.
دوی چې د سوداګرۍ د پراختیا او انلاین سوداګرۍ روزنې د مرکز د پرانیستې په مراسمو کې راټول شوي وو، وايي چې درس او زدهکړې د نارینه او ښځینه لپاره لازمي دي او چارواکي باید ورته زمینه برابره کړي.
د جوزجان ولایت په مرکز شبرغان ښار کې د اکټېډ په نوم د یوې نړۍوالې موسسې لهخوا د سوداګرۍ د پراختیا او انلاین سوداګرۍ روزنې مرکز پرانیستل شو او کار یې پیل کړ.
په جوزجان ولايت کې د اکټېډ موسسې مشر امان الله امين وايي، چې د دغه مرکز په پيلېدو سره به څه باندې پنځه زره کسان په بېلابېلو څانګو کې مسلکي زدهکړې ترلاسه کړي.
د ښاغلي امین په وینا، په دغو برخو کې (انلاین سوداګرۍ، د انګلیسي ژبې او کمپیوټر روزنه، ګرافیک ډیزاین او نورې مسلکي برخې) شاملې دي.
يو شمېر ځوانانو چې په دې غونډه کې برخه اخيستې وه، د دغه مرکز د پرانستلو د هرکلي په ترڅ کې د نجونو پر وړاندې د ښوونځيو او پوهنتونونو په تړل پاتې کېدو سخته نيوکه وکړه.
دوی وايي، د دغه ډول ښوونیزو مرکزونو پرانیستل د ښوونځیو او پوهنتونونو ځای نه نیسي؛ نو باید په دې برخه کې د خلکو غږ پورته شي.
دغو ځوانانو دیني او اسلامي لارښوونو ته اشاره وکړه او زیاته یې کړه، اسلام هم په دې ټینګار کړی چې د علم او پوهې ترلاسه کول په نارینه او ښځو فرض دی.
کابو دوه کاله کېږي، چې طالبانو د نجونو پر وړاندې ښوونځي او پوهنتونونه تړلي او دوی ته یې د زدهکړو د دوام اجازه نهده ورکړې.