د سپینې ماڼۍ د امنیت شورا ویاند جان کربي د افغانستان انټرنشنل خبریال ته ویلي، چې د امریکا سیاست د طالبانو پر وړاندې نه دی بدل شوی. هغه یو ځلې بیا ټینګار وکړ، چې طالبان د نړۍ د غوښتنو خلاف حرکت کوي او د نړۍوال مشروعیت له ترلاسه کولو واټن اخلي.
ښاغلي کربي په نیویارک کې یوې خبري ناسته کې د افغانستان انټرنشنل خبریال عارف یعقوبي په ځواب کې وویل، چې طالبان په افغانستان کې د حکومتولۍ او د ښځو او نجونو سره د چلند په برخه کې د خپلو ژمنو خلاف کړنې کوي.
د سپینې ماڼۍ د امنیت شورا ویاند زیاته کړې:« هغوی نه یوازې دا چې په خپلو ژمنو عمل نه دی کړی؛ بلکې د هغو خلاف لاره یې خپله کړې ده.»
کربي یو ځل بیا ټینګار وکړ، چې په دغه وضعیت کې واشنګټن د طالبانو د رسمیت پېژندنې نیت نه لري.
سره له دې چې امریکا لا هم د طالبانږ په کړنو کې د بدلون په راوستلو ټینګار کوي؛ خو پر دغې ډلې د فشارونو د زیاتولو لپاره د طالبانو د مخالفینو غوښتنو ته یې کوم مثبت ځواب نه دی ویلی.
د افغانستان په چارو کې د امریکا ځانګړي استازي په وار،وار د داعش پر وړاندې د طالبانو د لاسته راوړنو یادونه کړې ده.
کربي وویل، چې په افغانستان کې د القاعدې ډله « په یقیني توګه ډېره کمزورې شوې ده او داسې نه ښکاري، چې افغانستان ته دې بېرته ستنه شي.»
هغه زیاته کړې، چې په افغانستان کې ټولې ترهګرې ډلې د امریکا تر څار لاندې دي.
دغه کورنۍ افغانستان انټرنشنل ـ پښتو وویل، چې وژل شوی نصیر احمد په تېر نظام کې د پکتیا په امنیه قومندانۍ کې دنده درلوده.
په تېر حکومت کې د یو نظامي کورنۍ، چې د پکتیا زرمت لسوالۍ د سهاکو د کلي اوسېدونکې وه او اوس مهال د کابل کارته نو د سیمه کې اوسیږي، نن دوشنبه (د سنبلې ۲۷ مه) افغانستان انټرنشنل ـ پښتو ته وویل، چې د سنبلې په ۱۱ مه د طالبانو په نظامي یونيفورم سمبال وسلوالو نصیر احمد له خپل کور څخه ونیو.
دغه کورنۍ زیاتوي، چې نصیر احمد له څو ورځې شکنجې وروسته خوشې او خپل کور ته راغی؛ خو سمدستي یې طالبانو پر کور عملیات وکړل او نوموړی له خپلو څلورو ملګرو سره چې د نوموړي پوښتنې ته راغلي وو وواژه.
دوی زیاتوي:" طالبانو رسول خان، سیف الله، عقل شاه او یو بل ملګری په کور کې ووژل".
د طالبانو د کورنیو چارو وزارت د سنبلې ۱۹ مه اعلان وکړ، چې ددې وزارت د ځانکړو ځواکونو د قوماندانۍ په کشفي او اپراتیفي معلومات پر بنسټ د کابل کارته نو سیمه کې پر یو کور عملیات وکړل، چې د انسان تښتوونکو ډلې ۴ کسان یې ووژل.
خو یاد وزارت پر خپلې اېکس پاڼې لیکلي وو، چې په دغه عملیاتو کې یو تښتول شوی کس هم ووژل شو.
د وژل شويو کورنۍ د طالبانو د کورنیو چارو وزارت دا ادعا بې اساسه او یوه دسیسه بولي.
دا کورنۍ د طالبانو له مشرانو او د بشري حقونو له نړۍوالو بنسټونو غواړي، چې د دغې پیښې بې طرفه او هر اړخیزه څېړنه دې وشي.
بل خوا دا کورنۍ وايي؛ د دوی د کورنۍ زیاتره نارینه غړي د جمهوریت پرمهال په نظامي لیکو کې دندې درلودې او هغه وخت د طالبانو د اوبو او برېښنا وزیر عبدالطیف منصور، چې د پکتیا زرمت ولسوالۍ کې د طالبانو د (منصور ګروپ) وسلوالو مشري په غاړه درلوده، ددې ډلې واک ته له رسېدو سره د ملا هبت الله د بښنې وروسته هم دغه ځايي ډله له خپل واک څخه ناوړه ګټه اخلي او له دوی سره شخصي دښمني پالي.
منصور ګروپ د طالبانو یوه له هغو وسلوالو ډلو څخه وه، چې د وروستي جمهوریت پر مهال یې د لویې پکتیا په بېلابېلو سیمو کې د دولت ضد فعالیتونه کول.
دوی ادعا کوي، چې اوس مهال ددې کورنۍ یو بل غړی نثار احمد اوس هم د طالبانو په بند کې دی او دوی ګواښل کیږي، چې د نوموړي د خلاصون لپاره دې کومه هڅه ونه کړي، کنه د کورنۍ نور غړي به یې هم ورته زنداني کړي.
د دې راپور په اړه مو هڅه وکړه، چې د طالبانو د اوبو او برېښنا وزیر عبدالطیف منصور او د کورنیو چارو وزارت نظر واخلو، خو په دې کار بریالي نه شو.
انځور : نثار احمد د وژل شوي نصیر احمد د تره زوی
