د طالبانو د اوبو او انرژۍ وزیر عبداللطیف منصور د ترکمنستان د انرژۍ د نړۍوالو پروژو له مشر سره وکتل. نوموړي په دې کتنه کې د «ټاپ» پروژې د عملي کولو او همغږۍ په موخه د ترکمنستان، افغانستان او پاکستان د ګډې ناستې د جوړولو غوښتنه وکړه.
د دغه وزارت په خبرپاڼه کې راغلي، چې په دې کتنه کې د برېښنا د لېږد د مزو د غځولو او د نور الجهاد سب سټېشن د پروژې په اړه هم خبرې وشوې.
په دې کتنه کې عبداللطیف منصور د درې واړو هېوادونو ترکمنستان، افغانستان او پاکستان ترمنځ د ګډې «ټاپ» پروژې د ژر تر ژره پلې کېدو په برخه کې په همغږۍ ټینګار کړی.
خبرپاڼه زیاتوي، چې د ترکمنستان د انرژۍ د نړۍوالو پروژو مشر مراد ارتیکوف هم د ټاپي سیمهییزې پروژې په اړه د درې اړخیزې ناستې وړاندیز تایید کړ او ډاډ یې ورکړ، چې ترکمنستان له افغانستان سره د ګډو همکاریو دوام ته ژمن دی.
د طالبانو د انرژۍ او اوبو وزارت د مراد ارتیکوف په حواله لیکلي، چې تمه ده په هرات ولایت کې د نورالجهاد سب سټېشن او د ۱۱۰ کیلو ولټ برېښنا د لېږد لین پروژې تر راتلونکې ژمي پورې بشپړې شي.
په ۱۳۹۶ کال کې د افغانستان، ترکمنستان، پاکستان او هند د مشرانو په حضور کې له ترکمنستان څخه د افغانستان له لاري پاکستان ته د (ټاپ) د ۵۰۰ کیلو ولټه برېښنا د لېږد کار پیل شو.
په وروستیو کلونو کې طالبان د سیمهییزو پروژو د عملي کولو پر وړاندې لوی خنډ او ګواښ و.
د پخواني افغان حکومت له نسکورېدو او واک ته د طالبانو له رسېدو سره، دغې ډلې په وار، وار له افغانستان څخه د انرژۍ د لېږد د پروژې د عملي کېدو غوښتنه کړې او ټینګار یې کړی، چې د برېښنا د لېږد د پروژې امنیت به ټینګ کړي.