د اوکراین ولسمشر ولادیمیر زیلینسکي په سپینه ماڼۍ کې د امریکا له ولسمشر جوبایډن سره وکتل.
دا په اوکراین د روسیې د یرغل له پیل راهیسې واشنګټن ته د ولادیمیر زیلینسکي دویم سفر دی.
په دې غونډه کې جوبایډن یو ځل بیا له اوکراین سره پر خپل ملاتړ ټینګار وکړ.
د امریکا ولسمشر ټینګار وکړ، چې نړۍ د روسیې د یرغل پر وړاندې د اوکراین ترڅنګ ولاړه ده.
ښاغلي بایډن په دې لیدنه کې چې د پنجشنبې په ورځ وشوه اعلان وکړ، چې اوکراین ته به د امریکا د پوځي مرستو یوه نوې کڅوړه واستول شي.
نوموړي وویل، چې په راتلونکې اونۍ کې به لومړنۍ ابرامز ټانکونه اوکراین ته وسپارل شي.
ولادیمیر زیلینسکي د اېکس په ټولنیزې شبکه کې لیکلي: "ما د متحده ایالاتو له ولسمشر څخه د هغه د ملاتړ او د نويو پوځي مرستو د کڅوړې مننه وکړه او دا هغه څه دي چې زموږ سرتېري اوس ورته اړتیا لري."
ښاغلي زیلینسکي ټینګار وکړ، چې واشنګټن او کییف به د غلو دانو د صادراتو د اسانتیا او د اوکراین د سولې د فورمول لپاره د نړۍوال ملاتړ د زیاتولو لپاره ګډ کار ته دوام ورکړي.
ولادیمیر زیلینسکي د امریکا د دفاع له وزیر لوید اسټین سره هم په لیدنه کې خبرې اترې کړې دي.
اوکراین ویلي، چې ولادیمیر زیلینسکي او لوویډ اسټین د دفاعي ځواکونو لپاره د توپونو سیسټمونو او د اوږد واټنه وسلو چمتو کولو او همدارنګه د اوکراین د هوایي دفاع د پیاوړتیا په اړه خبرې وکړې.
د اوکراین ولسمشر د امریکا دفاع وزیر ته هم بلنه ورکړه، چې د دفاعي صنایعو په غونډه کې چې ټاکل شوې په کییف کې جوړه شي، ګډون وکړي.
ولادیمیر زیلینسکي د ملګرو ملتونو په ۷۸مې عمومي اسمبلۍ کې په خپلې وینا کې وویل، چې پر روسیې باید باور ونه شي.
هغه وویل، چې اوکراین به هر هغه څه وکړي چې د روسیې تر برید وروسته به په نړۍ کې هیڅوک په بل هېواد د برید جرائت ونهکړي.