روسیې په وروستیو اونیو کې د خپل تر ټولو لوی توغندیز برید کې په اوکراین کې د انرژۍ پر تاسیساتو ۴۳ کروز توغندي توغولي دي. اوکرایني چارواکو د دغو بریدونو په پایله کې په پنځو سیمو کې د برېښنا د پرې کېدو او د څه باندې ۱۸ کسانو د ټپي کېدو خبر ورکړ.
د دغو چارواکو په وینا، دا د اوکراین د برېښنا پر ملي شبکې د روسیې لومړی برید دی چې د دغه هېواد پر پنځو سیمو په تېره بیا په لویدیځ، ختیځ او مرکز کې د برېښنا د پرې کېدو لامل شوی دی.
په کییف کې چارواکو وویل، د روسیې له ۴۳ کروز توغندیو څخه چې په څو هدفونو توغول شوي وو ۳۶ یې ویشتل شوي دي.
د اوکراین د دفاع وزارت اعلان کړی، چې د یوه توغندي پاتې شوني د اوکرایین د پلازمېنې کییف په مرکز کې غورځېدلي او څو ودانیو ته یې زیان هم اړولی دی.
د کییف چارواکو ویلي، چې په دغو روسي هوايي بریدونو کې د یوې ۹ کلنې نجلۍ په ګډون د ۱۸ کسانو په ټپي کېدو سربېره د روسیې د شپې د ډزو په پایله کې دوه کسان وژل شوي هم دي.
د اپراتور شبکې "اوکراینرګو" اعلان وکړ ، چې دا په تېرو شپږو میاشتو کې د برېښنا پر زیربنا د روسیې لومړی برید دی.
له دې سره د روسیې د دفاع وزارت په یوې خبرپاڼه کې لیکلي، چې د دغه هېواد برید پوځي صنعتي تاسیساتو او د راډیو استخباراتي تاسیساتو ته زیان رسولی دی.
د اوکراین ولسمشر ولادیمیر زیلینسکي چې د ملګرو ملتونو په عمومي غونډه کې د ګډون لپاره امریکا ته په سفر تللی، د روسیې دغه برید یې غندلی دی.
روسیې په ۱۴۰۰ میلادي کال کې د سلواغې له میاشتې راهیسې په لسګونو زره پوځیانو سره پر اوکراین پوځي برید پیل کړ او د ۱۴۰۱ میلادي کال د مرغومې تر میاشتې یې د اوکراین د غلو د صادراتو زیربناوې په نښه کړې.
د روسیې دغو بریدونو اوکراین چې د نړۍ د غلو دانو یو له سترو صادرونکو هېوادونو څخه دی، د غلې دانې اړتیا لرونکي هېوادونه له ستونزو سره مخامخ کړې دي.
د راپورونو له مخې، په دغو بریدونو کې ولسي وګړي هم وژل شوي؛ خو روسیې ویلي، چې دوی یې په قصدي ډول نه دي وژلي.
په همدې حال کې پر اوکراین د روسیې له بریدونو وروسته د دغه هېواد پوځ هم تایید کړې، چې تېره شپه یې د روسیې په ولکه کې د کریمیې په ساکي هوايي اډې برید کړی چې د دغې اډې تجهیزاتو ته یې سخت زیان اړولی دی.
خو د روسیې له ملاتړه برخمنې ادارې مشر ویلي، چې د اوکراین هېڅ توغندی هدف ته نهدی رسېدلی.
