ایراني پولیسو یو افغان په تهران کې د ۹ نورو افغانانو د سوځولو په تور نیولی دی
د ایراني رسنیو د راپورونو له مخې؛ یو افغان د تهران په جنوب کې نهه تنه نور افغانان سوځولي، چې په پایله کې یې دوه تنه وژل شوي او د نورو روغتیايي وضعیت نازک ښودل شوی دی.
د تهران پولیسو د دې کار انګیزه شخصي دښمني بللې ده.
د تهران د جنايي چارو د څارنوالۍ د څلورمې څانګې پلټونکي وويل، چې تورن په پټه يو کور ته ننوتلی او نهه تنه ځوانان يې په داسې حال کې چې ويده وو؛ سوځولي دي.
تورن د تېښتې پر مهال په لاسونو، پښو او مخ سوځېدلی او نیول شوی دی.
د پولیسو په وینا؛ تورن تر نیول کېدو وروسته په خپل جرم اعتراف کړی او د دغه عمل انګیزه یې داسې بیان کړې ده: «زه له افغانستان څخه ایران ته راغلم او کار مې پیل کړ، زه درې ورځې په یو کور کې اوسېدم، خو د کور خاوند له کوره وشړلم."
تورن له خپل کار ځای څخه د خپل ورور د شړلو خبره هم وکړه او ویې ویل: “زما ورور په یوه دوکان کې کار کاوه، چې د جنجال له امله هغه هم له کاره ګوښه شوی”.
هغه وويل چې دغه مسايل د دې لامل شوي، چې د دغو ٩ کسانو پر وړاندې کرکه یې پيدا شي او دغه ډول اقدام وکړي.
د تهران د جنايي چارو چارواکي وايي، چې د وژل شویو کسانو جسدونه د لا زیاتو څېړنو لپاره عدلي طب ته لېږدول شوي دي.
