د کابل د باغ بالا سیمې اوسېدونکو افغانستان انټرنشنل ته ویلي، چې طالبان پلان لري چې د اریوب سېنما ودانۍ په کرایه ورکړي. د ځايي خلکو په وينا؛ طالبانو پخوا د دې سېنما سيمه د موټرونو په تمځي بدله کړې وه.
د اریوب سېنما د خپلې ځانګړې معمارۍ له امله د افغانستان یو له مشهورو سېنماګانو څخه ده.
اریوب سېنما د باغ بالا په سیمه کې او د کابل ښار د څلورمې ناحیې د انټرکانټیننټل هوټل ته څېرمه موقعیت لري.
هغه عکسونه چې افغانستان انټرنشنل ته رسېدلي ښيي، چې د دې سېنما په ودانۍ کې یوه لویه لوحه ځړول شوې ده، چې دا "ودانۍ په کرایې ورکول کیږي" پر لېکل شوي دي.
د دغې سېنما ودانۍ په ۲۰۱۴ کال کې د فرانسې په مالي مرسته رغول شوې وه.
طالبانو د فلمونو او موسیقۍ ننداره «حرام» بللې ده. دغې ډلې د خپل رژیم په لومړی دوره کې د سېنما ارشیف او یو شمېر فلمونه وسوځول.
په تېر کې په کابل ښار کې شاوخوا ١٨ دولتي او شخصي سېنماګانې وې، چې يو شمېر يې د جګړو او بې غورۍ له امله ويجاړې شوې دي.
په تېرو دوو لسیزو کې ځینې سېنماګانې ترمیم شوې دي، چې ډېری یې هندي فلمونه نندارې ته وړاندې کول. د سېنما صنعت ته د کلتوري ودې او پاملرنې سره - سره، د افغانستان سېنما له پرمختګ څخه ووتله.
د 1400 کال په اوړي کې د طالبانو د واکمنۍ سره سېنماګانې په بشپړه توګه وتړل شوې.
په ۱۳۹۹ کال کې پخواني حکومت او کابل ښاروالۍ د فرهنګي فعالانو له مخالفت سره - سره د پارک سېنما چې د افغانستان یو له تاریخي سېنما ګانو څخه وه، ویجاړه کړه.
