د سیمه ییزو هېوادونو استازو د مسکو فارمټ غونډه کې په افغانستان کې له ترهګرۍ سره پر مبارزه او د ټولګډي یا همه شمول حکومت پر جوړولو ټینګار وکړ. دې استازو په افغانستان کې د بشري حقونو خلاف ورزۍ ته په اشاره له طالبانو وغوښتل چې د نړیوالې ټولنې اندېښنو ته ځواب ووايي.
په دې ناسته کې د چین استازي وویل، افغانستان کې د سولې کیلي د ټولګډي حکومت جوړولو او د ښځو د حقونو په خوندیتوب کې ده.
یو شیایویونګ زیاته کړه چې د افغانستان ګاونډیان د دغه هېواد د حالت ښه کولو کوشش کوي.
نوموړي د افغانستان د اوسني حالت پړه پر امریکا واچوله او زیاته یې کړه چې بېجینګ هڅه کوي د افغانانو اقتصادي حالت ښه شي.
نوموړي د غونډې له ګډونوالو هېوادونو وغوښتل چې د افغانستان د حالت ښه کولو هڅه وکړي.
هغه ترهګري او نشه يي توکي د افغانستان بله ستونزه وبلله او زیاته یې کړه چې طالبانو د داعش ختمولو لپاره هڅه کړې خو پوره نه ده.
د افغانستان لپاره د پاکستان استازي اصف دراني وویل، چې د انساني او ښځو حقونو په برخه کې د نړیوالې ټولنې اندېښنو ته ځواب نه دی ویل شوی.
نوموړي زیاته کړه چې د افغانستان له دریو دوه برخې خلک د ژوندي پاتېدو لپاره بشري مرستو پورې تړلي دي.
نوموړي وویل، د خپلو ګټو لپاره باید د افغانستان خلک یرغمل نه شي او زیاته یې کړه، تېرو دوو کلونو کې نړیوالې ټولنې د افغانانو لپاره څه کړي دي.
د هغه په خبره، د سیمې هېوادونه باید د افغانستان په هکله کارند او مثبت رول ولري.
د افغانستان په هکله د مسکو فارمټ غونډه نن د سپټمبر پر ۲۹ د روسیې په کازان ښار کې وشوه.