د خوړو نړۍوال پروګرام د بودجې کمښت د دې لامل شوی، چې دوی د لوږې او تغذیې ترمنځ یو وټاکي.
دغه پروګرام په اېکس پاڼه لیکلي، د مرستو وروستی کمښت به د دې لامل شي چې په میلیونونه کورنۍ د لوږې او خوارځواکۍ د اندېښنې کچې په منځ کې د خوړلو د ترلاسه کولو لپاره لالهانده وي.
د خوړو نړۍوال پروګرام زیاتوي، اوسمهال ۸۲۸ میلیونه وګړي هره شپه وږي ویده کېږي، په داسې حال کې چې د دغې ستونزې لپاره د حل لارې هم شته.
د دغې ادارې ترڅنګ ډېر شمېر مرستندوی بنسټونو په دې وروستیو کې په ځلونو د بودجې د کموالي او د ناوړه پایلو په اړه یې خبرداری ورکړی دی.
د دغه سازمان په خبره، راتلونکي ژمي کې د پنځلس میلیونه بې وزله افغانانو د لاسنیوي لپاره یو میلیارد ډالره مرستو ته اړتیا لري او که دغه مرستې ترلاسه نه کړي د دوی فعالیت به په افغانستان کې بند شي.
د ملګرو ملتونو شمېرې ښيي، چې افغانستان کې بشري مرستو ته د اړمنو کسانو شمېر له ۲۹ میلیونو پورته دی.
له دې سره، د ماشومانو د ملاتړ وجهي صندوق یا یونېسف وايي، په افغانستان کې شاوخوا ۱۶ میلیونه ماشومان بشري مرستو ته اړتیا لري او دغه اداره په افغانستان کې د ماشومانو د وضعیت او روغتیايي ستونزو په اړه سخته اندېښنه لري.
یونېسف وايي، په افغانستان کې له ۲۹،۲ میلیونه اړمنو کسانو څخه ۱۵،۸ میلیونه ماشومان بشري مرستو ته اړتیا لري.
دغه سازمان په دې وروستیو کې د یوه راپور په خپرولو سره وویل، چې ۸۷۵۰۰۰ ماشومان چې عمرونه یې تر پنځو کلونو کم دي د شدیدې خوارځواکۍ له امله درملنې ته اړتیا لري.
په همدې حال کې په افغانستان کې یو شمېر بېوزله کورنۍ چې ماشومان یې کمزوري او خوارځواکي دي وايي، چې دوی لا زیاتو مرستو ته اړتیا لري.
اوس د خوړو نړۍوال پروګرام په تازه راپور کې اندېښنه څرګنده کړې، چې د لوږې او تغذیې ترمنځ باید یو انتخاب کړي.