دا دوه ورځنی سمپوزیم چې د خبریالانو د ملاتړ سازمان له لوري په برلین کې جوړ شوی و، د اروپا له بېلابیلو هيوادونو څخه خبریالانو او د پوهنتون استادانو پکې ګډون درلود. په دغه پروګرام کې د افغانستان د ننه او بهر د افغان خبریالانو په حالت خبرې وشوې.
په دغه سمپوزیم کې چې ګڼو افغان خبریالانو او د بیلابیلو سازمانونو استازو برخه اخیستې وه. د بیان د آزادۍ، په هیواد دننه، دریمو هیوادونو لکه ایران او پاکستان کې د خبریالانو د اوسني حالت او همداراز د بیان د آزادۍ پروړاندې د راتلونکو ننګونو په اړه بحثونه وشول .
د خبریالانو د ملاتړ سازمان مشر حامد عبیدي وايي چې، په دې سمپوزیم کې په دې غور وشو چې په هیواد دننه او دریمو هیوادونو کې څنګه خبریالانو ته د کار زمینې برابرې شي چې د خبریالانو اوسنیو ستونزو ته حل لارې ولټولشي.
د نوموړي په خبره، په دې سمپوزیم کې د جرمنيبهرنیو چارو وزارت د استازي ترڅنګ د (سي پي جې)، (آر ایس ایف) او (ایم آی سي ټي) په ګډون څه باندې پنځلسو نړیوالو سازمانونو برخه اخیستې وه .
د خبریالانو د ملاتړ سازمان ویلي، «دا یو ښه چانس و چې د معتبرو نړیوالو سازمانونو په شتون کې په افغانستان، پاکستان، ایران او ترکیه هیوادونو کې د بند پاتې او له ستونزو سره د مخ خبریالانو په اړه غږ پورته کړو.»
دا سمپوزیم په داسې حال کې جوړیږي چې پر افغانستان د طالبانو له واکمنۍ وروسته تر ټولو ډیر بندیزونه د بیان پر آزادۍ او رسنیو لګېدلي، سلګونه خبریالان اوزګار شوي، لسګونه رسنۍ بندې شوې او سلګونه نور خبریالان بیا له هیواد څخه وتلي او روان دي.
اخوا، ډیر شمیر خبریالان اوسمهال په هیواد دننه او ځینو ګاونډیو هیوادونو کې له بیلابیلو ستونزو سره مخ دي او د رسنیو د ملاتړو پر ادارو نیوکه کوي چې ددوی ستونزو ته پاملرنه او رسېدنه نه کوي.
