د طالبانو د اطلاعاتو او فرهنګ وزارت مرستیال ویلي، په نیږدې راتلونکي کې به د دغې ډلې مشر د ځوانانو د فکري سمون لپاره فرمان صادر کړي. محمد یونس راشد وویل چې ملا هبت الله «د ځوانانو د فکري سمون او اقتصادي پیاوړتیا لپاره ستر ملي پلان» تصویب کړی.
د طالبانو د اطلاعات او فرهنګ وزارت دغه چارواکي د دې ډلې تر کنټرول لاندې ملي ټلویزیون ته ویلي، چې د ملا هبت الله امر به ډېر ژر په ډاګه شي او د دغه پلان جزیات به په یوه خبري کنفرانس کې خپاره شي.
طالبانو په تېرو دوو کلونو کې د ګڼو فرمانونو په صادرولو سره د هېوادوالو مدني ازادۍ ترې اخیستې دي.
دغې ډلې تر شپږم ټولګي پورته د نجونو د ښوونځيو د تړلو او پوهنتونونو ته د نجونو د تګ د منع کولو ترڅنګ، د ښاریانو د جامو په اړه هم سخت اصول ټاکلي دي.
له بلې خوا په دې موده کې طالبانو د افغانستان د پوهنې نظام ته بیا کتنه ونه کړه او د اسلامي شریعت د پلي کولو تر عنوان لاندې یې بدله کړه.
طالب چارواکو په ځلونو ویلي چې په تېرو دوو لسیزو کې د ځوانانو فکر د لویدیځ له عصري کلتور څخه اغېزمن شوی او دغه ډله هڅه کوي چې د ځوانانو فکر هم بدل کړي.
طالبانو په داسې حال کې د ځوانانو د ذهنونو بدلولو ته پام اړولی چې د دغې ډلې له لوري بندیزونه او همدا راز د زیاتېدونکي بېکارۍ له امله هېوادوال په ځانګړې توګه ځوانان له افغانستانه تښتي.
