سرچینې وایي، یو بل ناروغ چې په کانګو تبه اخته و د چهارشنبې په ورځ په یوه شخصي روغتون کې ومړ.
له دې سره، له تېرو څلورو ورځو راهیسې د کانګو تبې له امله د مړو شویو شمېر دوو تنو ته لوړ شو.
د راپورونو له مخې، دغه مړینې د اغا خان په روغتون کې راپور شوې دي.
د دغه روغتون یوه چارواکي شبیر عالم ویلي:« په ټوله کې د هغو ناروغانو شمېر چې شکمن او یا هم ټیسټونه یې مثبت ختلي، ۱۶ تنو ته رسېږي.»
هغه زیاته کړه:« دوه ناروغان چې د یوه د ازموینې ټیسټ منفي ختلی او بل چې له دغې ناروغۍ رغېدلی، دواړه رخصت شوي دي.»
د کانګو تبې له امله مړ شوی کس ۳۵ کلن و، چې میر واعظ نومېده او د پشین اوسېدونکی و.
د روغتیا ریاست د رسنیو همغږي کوونکي ډاکټر وسیم بېګ وویل:« په کانګو ناروغۍ د اخته شويو دوه ډاکټرانو او یوې روغتیا پالې روغتیایي حالت نازک ښودل شوی.»
د کانګو تبې په اړه د بلوچستان د روغتیا څانګې شمېرې ښیي، چې په تېرو دوو کلونو کې په صوبه کې د دغې ناروغۍ او مړینې د پام وړ لوړې شمېرې لیدل شوي، تېر کال ۲۱ مړینې ثبت شوې وې او سږکال تر دې دمه ۲۰ مړینې ثبت شوي.
يوه روغتيايي چارواکي رسنیو ته ویلي:«په روغتون کې د بستر شويو ډاکټرانو او نورو روغتيايي کارکوونکو د ژوند د ژغورلو هڅې روانې دي.»