د افغانستان په چارو کې د امریکا استازي ټام ویسټ د چهارشنبې په ورځ په دشت برچي کې د خونړیو بریدونو د څېړلو په اړه د ملګرو ملتونو د بشري حقونو د راپور ورکوونکي د غوښتنې ملاتړ وکړ.
ویسټ په اېکس پاڼه لیکلي، چې د دغه برید په اړه باید «بشپړې څېړنې» وشي.
په افغانستان کې د بشري حقونو په برخه کې د ملګرو ملتونو ځانګړي استازي ریچارډ بېنټ د لړم په ۱۷مه وویل چې، د دشت برچي د بریدونو د عاملینو د پېژندلو او د هغوی د حساب ورکولو لپاره باید هر اړخیزه او شفافه څېړنه وشي.
نوموړي دغه بریدونه «وحشتناک» وبلل.
ټام ویسټ په اېکس پاڼه د ښاغلي بېنټ غوښتنه بیا پوسټ کړې او لیکلي یې دي:« له یوې میاشتې څخه په کمه موده کې په هزاره توکمو له درېیم برید څخه غمجن دی.»
هغه زیاته کړه:« دا وحشیانه بریدونه باید ودرول شي او زه د بشپړې پلټنې غوښتنه کوم.»
د سه شنبې په ماښام (د لړم ۱۶مه) د کابل لوېدیځ په دشت برچي کې د مسافرو پر یوه بس موټر بمي چاودنه کې اوه تنه وژل شوي او ۲۰ نور ټپیان شوي دي.
داعش د دغه برید مسوولیت منلی دی.
په تېره یوه میاشت کې دا د کابل په برچي سیمه کې درېیمه چاودنه ده.
د پنجشنبې په ماښام (د لړم ۴مه) په یوه ورزشي کلپ کې چاودنه وشوه، چې په پایله کې یې لږ تر لږه څلور تنه ووژل شول او شاوخوا ۱۰ تنه ټپیان شوي وو.
