د پاکستان پوځ د چهارشنبې په ورځ وویل چې امنیتي ځواکونو ډیورنډ کرښې ته څېرمه د خیبر پښتونخوا ایالت په چترال سیمه کې دوه وسله وال وژلي دي.
د پاکستان پوځ د رسنیو څانګې په وینا، په دغو عملیاتو کې چې تېره شپه ترسره شول، څلور نور جنګیالي سخت ژوبل شوي دي.
دوه ورځې وړاندې هم د خيبر پښتونخوا په تيرا کې د پوځيانو او جنګيالو ترمنځ په نښته کې د پوځ يو قوماندان او درې امنیتي عسکر وژل شوي دي.
د پوځ په وینا، په دغو عملیاتو کې درې "ترهګر" وژل شوي او درې نور ټپیان شوي.
په وروستیو میاشتو کې په پاکستان کې د تحریک طالبان پاکستان په ګډون د اسلامپالو جنګیالیو بریدونو زور اخیستی.
د پاکستان پنجاب ایالت په میانوالي کې پر یوه هوايي اډې له وروستي برید وروسته د پاکستان پوځ په پوځي او نورو حساسو ځایونو کې امنیتي تابیاوې زیاتې کړي دي.
په دغه بريد کې درې الوتکې زیانمنې شوې او د تېلو يو ټانکر هم ويجاړ شوی و.
پوځ ویلي چې د میانوالي په روزنیزې هوايي اډې د شنبې ورځې برید د امنیتي ځواکونو د "چټک او اغیزمن ځواب" له امله په پراخه کچه شنډ شو او په دغه برید کې ټول نهه بریدګر ووژل شول.
د پاکستان لنډمهاله لومړي وزیر انوارالحق کاکړ د چهارشنبې په ورځ په یوه خبري غونډه کې وویل، په افغانستان کې د طالبانو له واک ته رسېدو وروسته، د اسلام اباد د تمې خلاف، په دغه هېواد کې د تاوتریخوالي کچه ۶۰ سلنه لوړه شوې ده.
هغه له ترهګرۍ سره د مبارزې په برخه کې د طالبانو پر نه همکارۍ نیوکه وکړه او ویې ویل چې، د افغان کډوالو د شړلو اصلي لامل له اسلام اباد سره د طالبانو نه همکاري او پاکستاني طالبانو ته د دغې ډلې پناه ورکول دي.