طالبانو او ایران د همکارۍ پنځه سندونه لاسلیک کړل
ایرانۍ رسنۍ وايي، د دغه هېواد چارواکو د ملا عبدالغني برادر اخوند په مشرۍ د طالبانو له پلاوي سره د اقتصادي همکارۍ پنځه سندونه لاسلیک کړل. دا سندونه د ټرانسپورټ، ملکي هوايي چلن، کانونو، ازادو تجاري سیمو او د اصفهان اوسپنې کارخانې سره د همکارۍ په برخه کې دي.
د طالبانو د رییس الوزرا اقتصادي مرستیال ملا عبدالغني براد تېره یکشنبه د یوه دېرش کسیز پلاوي په مشرۍ ایران ته لاړ او ټاکل شوې چې نن کابل ته ستون شي.
د ایرنا د راپور له مخې، ایراني چارواکو پرون د دې سندونو په لاسلیکولو سره وویل، چې د اقتصادي همکاریو ګډ کمېسون په غونډه کې یې له طالب پلاوي سره د ځمکې لارې نړیوال ټرانسپورټ، د ایران او افغانستان د ملکي هوایي چلن د ادارو، د اصفهان د اوسپنې ویلې کولو شرکت او ازادو تجاري سیمو کې د همکارۍ سندونه لاسلیک کړل.
د اصفهان د اوسپنې وېلې کولو شرکت مشر مهدي کوهي دې مراسمو کې وویل، چې دغه شرکت د افغانستان له تجارت او صنعت وزارت سره تړون لاسلیک کړ.
د هغه په خبره، افغانستان ډېر کانونه لري او دوی به په تخنیکي او انجینري برخه کې ور سره مرسته کوي.
ښاغلی کوهي زیاتوي چې د اصفهان شرکت له طالبانو سره د اوسپنې کانونو په اېستلو کې هم همکاري کوي.
نوموړی وايي، راتلونکي کال به د اوسپنې ویلې کولو کچه ۵۰ میلیون ټنو ته ورسوي او دې هدف ته د رسېدو لپاره یې له افغان کانونو د کار اخیستلو په برخه کې له طالبانو سره خبرې کړې دي.
