په افغانستان کې د اېسارو پاکستانیانو پرضد تورخم ته ورڅېرمه لاریون وشو
د خېبر پښتونخوا په قبايلي سيمه د تورخم په نادرا چوک کې سیاسي فعالانو د جمعې په ورځ په يوه لاريون کې د طالبانو د حکومت لهخوا د اېسارو پاکستانيانو د خوشې کېدو غوښتنه وکړه.
دغه کسان هغه کارګران دي، چې له ویزې او پاسپورټ پرته د کار کولو لپاره افغانستان ته تللي؛ خو اوس یې طالبان د پاسپورټ او وېزو پرته نه پرېږدي چې پاکستان ته راواوړي.
په دغه لاریون کې د بېلابېلو سیاسي ګوندونو استازو ګډون کړی و.
لاریون کوونکو له پاکستاني چارواکو هم وغوښتل، چې له کابل سره په خبرو کې دې د نیول شویو کسانو د ستنولو زمینه برابره کړي.
د کابل او اسلام اباد تر منځ د ترېنګلتیاوو وروسته، د دواړو هېوادونو ترمنځ اړیکې ورځ تر بلې د کړکېچ پر لورې کږېږي.
د لاریونوالو په وینا، هغه پاکستاني وګړي چې افغانستان ته تللي وو، اوس د تورخم هاغاړې ته بند پاتې دي.
لاریونوال له طالبانو غواړي، چې له هغو کړنو دې ډډه وکړي چې عامو خلکو ته ستونزې راولاړوي.
په دغه لاريون کې د افغان طالبانو پر ضد شعارونه هم ورکړل شول او دغه مسله له درېیو ورځو راهیسې دوام لري.
