خوست کې د ملا هبت الله له فرمانه سرغړونې سره یو کس صحرايي محاکمه او ویډيو ترې ثبت شوې ده

AP ۱۴۰۲ لړم ۲۱

افغانستان انټرنشنل ـ پښتو ته رسېدلې ویډیو کې ښکاري چې څو طالبان د خوست تڼیو ولسوالۍ ودانۍ ته څېرمه د یو ځوان د سر وېښتان او برېتونه قیچي کوي.

د ځايي سرچینو په وینا دغه ځوان بادشاه زالله نومیږي. د تڼیو ولسوالۍ د للمي کلي اوسیدونکی دی او په تېر نظام کې یې کومه دنده هم نه درلوده.

افغانستان انټرنشنل د دې ویډیو په اړه نن یکشنبه د لړم ۲۱ مه د خوست تڼیو ولسوالۍ له اوسیدونکو سره خبرې وکړې او موندنې ښیي چې دغه ویډیو دوه اوونۍ وړاندې ثبت شوې ده.

که څه هم د بادشاه زالله جرم نه دی معلوم خو په دغه وېډيو کې یو طالب ور سره خبرو کې وايي چې کواکې د طالبانو په شان څېره یې جوړه کړې ده او د «مجاهد» له نومه ناوړه ګټه اخلي.

دغه خوستی ځوان په ژړه غوني غږ طالب ته وايي چې برېتونه دې ورته نه قیچی کوي خو طالب وسلوال یې خبرو ته پام نه کوي او د سر وېښتانو ترڅنګ یې برېتونه هم ورته قیچي کوي.

په خبرو کې دا ځوان وايي چې تر دې یې مړ وی، نو ښه و، په مقابل کې یو طالب ورته وایي، که زموږ قومندان ته دا خبره وکړې، ممکن هغه دې ووژني.

څو میاشتې وړاندې په کندهار کې ناست د طالبانو مشر ملا هبت الله یو فرمان صادرلو سره امر وکړ، چې له دې وروسته هیڅ طالب له محکمې پرته د هیڅ مجرم ته سزا نشي ورکولی.

په دغه فرمان کې راغلي و، چې مجرم ته د سزا ورکولو پرمهال د انځورونو او وېډیوګانو اخیستو اجازه نشته.

دغه وېډیو په ټولنیزو رسنیو کې د ګڼو افغانانو پراخ غبرګونونه راپارولي دي.

د خوست یوه اوسیدونکي لیکلي دي چې دا کس بله لاره نه لري ترڅو د طالبانو پرضد وسله واخلي او وجنګیږي، دا یوه سحرايي محاکمه ده او هیڅ څوک دا حق نه لري چې د چا غرور مات کړي.

د خوست یو بل اوسیدونکي لیکلي چې که هر څومره لوي مجرم وي، دوی حق نه لري چې داسې چلند ورسره وکړي، که دوی بیا دا صلاحیت لري نو بیا عدلي او قضايي ارګانونه د څه لپاره دي.

له دې وړاندې هم ورته وېډیوګانې خپرې شوې دي خو تر اوسه طالبانو خپل وسلوال د ورته کړنو له امله نه دي محاکمه کړي.

نیوکې دا دي چې طالبان د خپلو غړو د محاکمه کولو لپاره کوم قانون نه لري او دغې ډلې په افغانستان کې د رسنیو سانسورولو سره له مطبوعاتو هم پر طالبانو د نیوکو چانس اخیستی دی.

اوس پوښتنه دا ده چې ایا د دې وېډیو خپرېدو سره به اوس طالبانو د خپل مشر ملا هبت الله له فرمانه سرغړونکي طالبان علني محکمه کړي او کنه؟

نور خبرونه

رادیو