له پاکستانه په زور اېستل شوي افغان کډوال چې تازه هیواد ته راستانه شوي په افغانستان کې د کار نشتوالي په اړه شکایت کوي. په ورستیو دریو اونیو کې تر دوه نیم لکه ډیر افغان کډوال د پاکستان حکومت له لورې په زور له دغه هیواده و اېستل شول او لا هم دا لړۍ روانه ده.
د افغانستان په بېلابېلو ولایتونو کې تازه راستانه شوي کډوال مېشت شوي خو دغه کډوال د اوزګارۍ څخه سر ټکوي.
شمس الله د یوې۱۲ کسیزې کورنۍ سرپرست دی لس ورځې وړاندې د سپین بولدک له لارې له پاکستانه هیواد ته راستون شوی.
نوموړی وایي، که څه هم نړیوالو مرستندویه سازمانونو او خیریه بنسټونو ورسره لومړنۍ مرستې وکړې خو په هیواد کې د اوزګارتیا له امله سوکاله نه دی.
شمس الله افغانستان انټرنشل ـ پښتو ته وايي:«نږدې۳۰ کلونه مو د پاکستان په کراچۍ ښار کې ژوند وکړ، هلته مې واده وکړ اولادونه مې پیدا شول. خو د پاکستان حکومت له لورې په زور افغانستان ته را واستول شوم. زه په افغانستان کې یوه لوېشت ځمکه نه لرم، دلته اوس په کرایي کور کې اوسیږم کار او روزګار نشته.»
طالبانو ژمنه کړې چې افغانستان ته راستانه شویو افغان کډوالو ته د کار زمینه برابروي، خو له پاکستانه د ستنېدونکو کډوالو اوزګارۍ او لوږه له وړاندې په بیساري کچه لوړه ده.
ذبیح الله چې له پاکستان څخه تازه افغانستان ته راستون شوی وايي: «موږ به تر څو د نړیوالو سازمانونو خیرات ته ناست یو؟ موږ ته دې طالبان ځمکې راکړي چې موږ خپل ژوند پیل کړو او موږ خپله اړتیا خپله پوره کړو.»
پر همدې مهال یو شمېر ځوانان وايي، نور باید کډوالو ته میلمستیاوې پای ته ورسیږي او د هغوی د ځای پر ځای کېدو او هغوی ته د کار پیدا کولو په اړه فکر وشي.
ځوانان وايي، کډوال نور باید د یو کاري ځواک په توګه په دنده وګمارل شي او د افغانستان پراخې شاړې ځمکې دې په واک کې ورکړل شي چې دا شاړې ځمکې ابادې کړي.
