پاکستانۍ رسنۍ وايي، په کراچۍ ښار کې د ډزو له امله یو افغان کډوال وژل شوی او پاکستانۍ مېرمن یې سخته ټپي شوې ده. د دې رسنیو د راپور له مخې؛ دا ډزې هم د افغان کډوال د مېرمنې پخواني مېړه کړې دي.
ډان ورځپاڼې لیکلي؛ وژل شوي افغان کډوال غوښتل له خپلې مېرمنې او له پخواني مېړه د هغې له څوارلس کلنې لور سره افغانستان ته ستون شي.
خو د دې افغان د مېرمنې پخواني مېړه د خپل وراره په مرسته د ناموسي غیرت په نوم هغه وواژه.
ویل کېږي د دې افغان کډوال مېرمنې له پخواني مېړه طلاق هم اخیستی و.
په تورخم کې د ستنېدونکو افغانانو لپاره د طالبانو د اطلاعاتو او عامه پوهاوي کمېټې مسوول وايي، پرون یې د کډوالو مېشت غالي کې ۵۰ ورک شوي ماشومان خپلو کورنیو ته وسپارل. نوموړي دا نه دي ویلي، چې دا ماشومان څومره وخت ورک وو او نور ورک ماشومان هم ور سره شته او که نه.
د ننګرهار لپاره د طالبانو د اطلاعاتو او فرهنګ ریاست خپل ټولنیز ګروپ کې پرون هم د یوه ماشوم د ورکې خبر خپور کړی او لیکلي یې دي چې درې اونۍ کېږي له پاکستان ستون شوی؛ خو خپله کورنۍ ترې ورکه ده.
په دې ګروپ کې نن هم د یو بل ماشوم د ورکې اعلان خپور شوی او ویل شوي، چې د پښتونخوا له درګۍ راستون شوی او کورنۍ ترې ورکه ده.
طالبانو له خلکو غوښتي چې د دې دواړو ماشومانو د کورنیو په موندلو کې ورسره مرسته وکړي.
د ماشومانو د ورکې خبرونه په داسې مهال دي، چې په پاکستان کې ځینې بندي شوي افغانان وايي؛ پولیس یې تر نیولو وروسته ماشومان او ښځې له نارینه و جلا کوي.
یوې ستنې شوې افغانې کډوالې افغانستان انټرنشنل - پښتو ته تېره اونۍ وویل؛ پولیسو یې د کورنۍ له نیولو وروسته پلار ترې جلا کړ او تر ۲۸ ورځې بند وروسته یې تورخم کې سره وموندل.
د خېبر پښتونخوا والي حاجي غلام علي نن پخوانی قاضي ارشد حسین شاه د دې صوبې د نوي سرپرست وزیر اعلی یا سر وزیر په توګه وګوماره. پخواني سر وزیر محمود خان او د اپوزیسیون ګوند مشر اکرم خان دراني د نوموړي د ګومارل کېدو سپارښتنه کړې وه او والي ومنله.
ارشد حسین شاه تر منظورۍ وروسته د خپلې دندې لوړه هم وکړه.
متقاعد قاضي سید ارشد حسین د پښتونخوا د ایبټ اباد اوسېدونکی دی. تر دې مخکې یې د پښتونخوا د لوی څارنوال، د پاکستان د مرستیال لوی څارنوال او د ګلګت بلتستان د لوی قاضي په حیثت دنده کړې ده.
نوموړی تر پرون د پښتونخوا د قانون او انساني حقونو صوبايي وزیر و.
د خېبر پښتونخوا اعلی وزیر محمد اعظم خان پرون د ورپېښې ناروغۍ له امله مړ او په چارسده کې خاوره ته وسپارل شو.
خان د روان کال په جنورۍ میاشت کې د خېبر پښتونخوا د وزیر اعلی په توګه لوړه کړې وه.
د افغانستان انټرنشنل ـ پښتو معلومات ښيي چې د څو ورځو راهیسې د طالبانو تر کنټرول لاندې د افغانستان دولتي اژانس "باختر" وېبپاڼه کار نه کوي. تر اوسه پورې د باختر خبري اژانس ادارې د وېبپاڼې د بندېدو په اړه څه نه دي ویلي، چې ستونزه نخنیکي ده او که دغه وېبپاڼه هېک شوې ده.
د افغانستان یوازینی دولتي اژانس چې اوسمهال د طالبانو تر کنټرول لاندې دی او تر ډېره د دغې ډلې د حکومت چارې پکې خپریږي.
د څو ورځو راهیسې د نامعلومو دلایلو له امله تړل شوی دی او د افغانستان دننه او بېرون کار نه کوي.
افغانستان انټرنشنل - پښتو ته د باختر اژانس دننه یوې سرچینې وویل، چې وېبپاڼه د کار لاندې ده او د تخنیکي ستونزو له امله تړل شوې ده.
د طالبانو تر کنټرول لاندې باختر دولتي اژانس پر اېکس پاڼه له څو ورځو راهیسې ورځیني راپورونه خپروي؛ خو د تېر په څېر له دغو خبرونو سره د وېبپاڼې ادرس نه خپریږي.
ددغه اژانس پر اېکس پاڼه درې ورځې وړاندې د وېبپاڼې ادرس خپور شوی دی.
باختر دولتي اژانس د افغانستان په ټولو ولایتونو کې د اطلاعاتو او فرهنګ وزارت په چوکاټ کې ځانګړي مدیرتونه او څانګې لري.
دغه اژانس په ټولو ولایتونو کې د خبري پوښښ لپاره خبریالان لري او تر ډېره د طالبانو دولتي فعالیتونو ته انعکاس ورکوي.
په افغانستان کې د طالبانو واک ته رسېدو سره مېټا کمپنۍ اعلان وکړ، چې په فیسبوک ټولنیزۍ رسنۍ کې به د دغې ډلې فعالیتونو محدودوي او د ملي ټلویزیون په شمول یو شمېر دولتي ادارو فېسبوک پاڼې وتړلې؛ خو په اېکس کې د دغې ډلې فعالیتونه او تبلغات اوس هم دوام لري.
د طالبانو په واک کې افغانستان بانک وايي، د هېواد پولي بازارونه په دقت سره څاري او د بیو د ټیکاو ساتلو لپاره اړین ګامونه اخلي. د دې بانک دا اعلامیه له هغه وروسته ده، چې افغانۍ په دې ورځو کې د ډالر په مقابل کې بې سارې پورته شوې ده.
نن د کابل په شهزاده سرای کې یو ډلر له ۶۷ په کمو افغانیو تبادله شوی دی او لامل یې هم په بازار کې د افغانۍ د غوښتنې یا تقاضا زیاتېدل بلل کېږي.
د افغانۍ د ارزښت د لوړېدلو په درشل کې طالبانو د کندهار په ګډون په مختلفو سرحدي ولایتونو کې د پاکستانۍ روپۍ پر راکړه ور کړه بندیز ولګاوه او هم ویل کېږي افغان کډوالو ستنېدو سره کالدارې افغانستان ته وړې دي چې اوس یې پر افغانۍ بدلوي.
د افغانۍ د ارزښت بې ساري زیاتېدو سره بیا هم نیوکه دا وي، چې د توکو بیې د پخوا په څېر وي او هم ور سره په بازار کې د افغانۍ کمېدو اندېښنه زیاتېږي.
خو افغانستان بانک وايي، د اړتیا په صورت کې د هېواد د بازارونو او مالي ادارو افغانۍ او اسعاري اړتیاوې پوره کوي.
طالبان زیاتوي: «په کافي اندازه د افغانیو بانکنوټونه د افغانستان بانک په واک کې دي او د پخوا په څېر د هېواد د پولي شاخصونو په پام کې نیولو سره یې په خپرولو او توزیع کولو اقدام کېږي او په دې برخه کې باید هېڅ ډول اندېښنه نه وي».
دا له نېږدې شپږو کلونو وروسته افغانۍ د ډالر په مقابل کې خپل پخواني ارزښت ته ستنېږي.
د طالبانو په واکمنېدو سره یو ډالر د ۱۳۵ سره برابر تبادله شو؛ خو افغانستان ته د ډالري بستو په پیلېدو د افغان ارزښت ورو - ورو زیات شو.
د افغانستان په چارو کې د پاکستان ځانګړی استازی وايي، له سرحدي سیمو د پاکستاني طالبانو د غړو د لېږدولو پلان عملي نه شو. اصف دورانی وايي، د دې ډلې شپږ زره غړي او کورنۍ یې په افغانستان کې ژوند کوي او پاکستان ته د بریدونو لپاره ځي او بېرته ستنېږي.
اصف دورانی د سفیرانو تالار یوټیوب چینل سره پرون په مرکه کې بیا په افغانستان کې د دې ډلې پر پټنځیو نیوکه کوي او ویې ویل: دوی زموږ پر امنیتي ځواکونو بریدونه کوي او د ولس په وژلو کې لاس لري.
د طالبانو ویاند ذبیح الله مجاهد وايي، دوی په افغانستان کې هیچا ته اجازه نه ور کوي چې افغان خاوره د بل چا پرضد وکاروي.
هغه وايي، پاکستان دې د امنیت ټینګولو کې خپله ناکامي پر طالبانو نه اچوي.
خو ښاغلی دورانی وايي، افغان طالبانو د پاکستاني طالبانو پرضد هیڅ ګام نه دی پورته کړی.
د هغه په خبره، په افغانستان کې سوله پاکستان ته پر خپسکه بدله شوې، ځکه دغه هېواد کې داسې کسان پټنځي لري چې پر پاکستان بریدونه کوي.
دی زیاتوي چې د پاکستاني طالبانو وسلوال د افغان طالبانو په واک کې دی، اجازه ور کول کېږي چې له کرښې واوړي، خلک ووژني او بېرته ستانه شي.
نوموړي په پاکستان کې د طالبانو د جګړې د حرام بللو په هکله د ملا هبت الله اخوند فرمان د اسلام اباد او کابل ترمنځ د هوکړې برخه وبلله.
د ډیلي پاکستان ورځپاڼې د راپور له مخې، طالبانو او د پاکستان حکومت هوکړه کړې وه چې پاکستاني طالبان له ډیورنډ کرښې لرې کړي.
د دې رسنۍ د راپور له مخې، پاکستان منلې وه چې د دې لېږد مالي لګښت هم په غاړه اخلي، خو اصف دوراني په دې هکله څه نه دي ویلي چې دا پروسه ولې ناکام شوه.