د پاکستان د ترورېزم ضد ادارې اعلان وکړ، چې د دوی اجنټانو د دوشنبې په ورځ د حیدراباد په مټیاري کې له یوې نښتې وروسته د القاعدې یو غړی نیولی دی. دې ادارې په یوه بیان کې لیکلي، چې نیول شوی کس په دې وروستیو کې له متحده عربي اماراتو څخه شړل شوی و.
د یادې ادارې په خبرپاڼه کې راغلي، چې د حيدر اباد په مټياري سيمه کې د پاکستاني ځواکونو او القاعده شبکې د غړو ترمنځ د نښتې په پايله کې دوه نور کسان د پېښې له ځايه تښتېدلي دي.
خبرپاڼه زیاتوي، چې په دې نښته کې يو ميل کلاشينکوف او يو لاسي بم هم ترلاسه شوى دى.
د پاکستان د ترهګرۍ پر وړاندې د مبارزې ریاست په خبرپاڼه کې راغلي: "په لومړنیو څېړنو کې معلومه شوې چې نیول شوي ترهګر د القاعده شبکې د پیاوړتیا لپاره د سعودي عربستان، مالیزیا او افغانستان په ګډون څو هېوادونو ته سفرونه کړي وو".
په افغانستان کې د طالبانو له واک ته رسېدو وروسته دا لومړی ځل دی، چې په پاکستان کې د القاعده شبکې غړی نیول کیږي.
د پښتون ژغورنې غورځنګ بنسټګر غړي او د پاکستان د پارلمان پخواني غړي علي وزیر د چمن پرلت غونډې ته په وینا کې وویل، چې د پاکستان حکومت د مذهب په نوم پښتانه تباه کړي دي. نوموړي دا خبرې د تېرو ۲۳ ورځو راهیسې د روان پرلت په غونډه کې کړي دي او له افغان کډوالو سره کېدونکی ظلم یې غندلی.
هغه د ډېورنډ د کرښې دواړو غاړو ته د قومونو لپاره د ډېورنډ پر پوله د پاسپورټ او ویزې د نه منلو تر څنګ ویلي، چې افغانان له خپل وطن څخه په زوره شړل کیږي او د ویزو او پاسپورټونو قید ټاکل ورته د نه منلو خبره ده.
ښاغلي وزیر په چمن کې د مظاهره چیانو په منځ کې په داسې حال کې خبرې کولې، چې د پاکستان حکومت د پاکستان ځینو پښتنو سیاستوالو ته خبرداری ورکړی و، چې د امنیتي دلایلو له مخې دې په دې سیاسي غونډه کې ګډون ونه کړي.
علي وزیر د مظاهره کوونکو په منځ کې د وینا پر مهال د پاکستان حکومت تورن کړ، چې د اسلام او جهاد په نوم سوداګري کوي او د مذهب په نوم افغانستان او پښتانه تباه کوي.
نوموړي د سرحدي ستونزو او د افغان کډوالو په ډله ییز اخراج کې د پاکستان د موقت حکومت سیاستونو ته په اشارې سره خبرداری ورکړ، چې یوه ورځ به راشي چې "پښتانه او افغانان به تاسو ته د دې ظلم سزا درکړي".
د پاکستان د موقت لومړي وزیر انوارالحق کاکړ له ټاکل کېدو وروسته د نوموړي موقت حکومت د افغان کډوالو په تړاو یوه بې سارې پرېکړه وکړه.
د ښاغلي کاکړ په مشرۍ موقتې کابینې د خپل کار په لومړیو میاشتو کې له ۱.۷ میلیونو څخه زیاتو افغان کډوالو ته له پاکستان څخه د وتلو ضرب الاجل ټاکلی و او د ټاکلې مودې په پوره کېدو سره افغان کډوال په زوره وباسي.
د راپورونو له مخې؛ تر دې مهاله له ۲۲۰ زرو څخه زیات افغان کډوال بېرته افغانستان ته ستانه شوي دي او دا لړۍ لا هم روانه ده.
د دې ډلې د صنعت او سوداګرۍ د وزیر نورالدین عزیزي په مشرۍ د طالبانو یو پلاوی په درې اړخیزه غونډه کې د ګډون لپاره اسلام اباد ته رسېدلی دی. په دې پلاوي کې د طالبانو د مالیې، ټرانسپورټ او هوايي چلند ترڅنګ د بهرنیو چارو وزارت استازی شامل دی.
د طالبانو د صنایعو او سوداګرۍ وزارت د دوشنبې په ورځ ( د لړم ۲۲مه ) پر ایکس ټولنیزه شبکه یوه خبرپاڼه خپره کړې او لیکلي یې دي، چې دغه پلاوی د ازبکستان او پاکستان له استازو سره په درې اړخیزه غونډه کې د ګډون په هدف اسلام اباد ته تللی دی.
په اسلام اباد کې د افغانستان سفارت هم یوه ویډیو خپره کړې، چې وايي د طالبانو پلاوی به د دغه سفر پر مهال د دواړو هېوادونو ترمنځ د تګ راتګ او سوداګرۍ په برخه کې د ستونزو پر حل خبرې وکړي.
یو شمېر افغان سوداګرو افغانستان انټرنشنل ـ پښتو سره په خبرو کې وویل؛ اوس یوازې د افغانستان او پاکستان ترمنځ د داخلي تولیداتو سوداګری ادامه لري.
دوی زیاتوي؛ پاکستان په کراچۍ بندر کې د افغان سوداګرو په مالونو بندیز لګولی دی.
یو افغان سوداکر وايي؛ ۲۲۰ قلمه بېلابیل سوداګریز توکي چې پاکستان پرې بندیز لګولی دی او په یو شمېر خوراکي توکو یې لس فیصده مالیه زیاته کړې ده.
د ننګرهار ملي سوداګرو ټولنې رییس او د ننګرهار سوداګرۍ او پانګونې خونې د هیت مدیره غړي زلمي عظیمي افغانستان انټرنشنل ـ پښتو سره په خبرو کې وویل، چې په کراچۍ کې د افغان سوداګرو سلګونه کانټرونه ولاړ دي او پاکستان ورته ګڼې ستونزې جوړې کړي دي.
دی زیاتوي، چې د افغان سوداګرو ستونزو ته د حل په موخه یې د طالبانو ریاست الوزرا اقتصادي مرستیال ملا برادر او سوداګرۍ وزیر سره څو وارې لیدلي دي؛ خو دوی ورته ویلي چې ډېر ژر به د سوداګرۍ وزیر په مشرۍ یو پلاوی د پاکستاني چارواکو سره د خبرو په موخه دغه هېواد ته لاړ شي.
زلمی عظیمي نیوکه کوي، چې پاکستان تل د افغان سوداګرو پر توکو یوطرفه پرېکړې کوي، چې دا د افغانستان او پاکستان تر منځ د ټرانزیټ او سوداګرۍ یا ' اپټا ' تړون خلاف کار دی.
تمه کیږي سبا به د طالبانو د صنعت او سوداګرۍ د وزیر نورالدین عزیزي په مشرۍ پلاوی درې اړخیزه غونډه کې د کډون ترڅنګ په کراچۍ بند کې د افغان سوداګرو د توکو بار کانټرونونو د خوشې کېدو پر ستونزو د حل لپاره هم پاکستاني لوري سره خبرې وکړي.
پاکستان ته د طالبانو د استازو سفر په داسې حال کې کېږي، چې پاکستان په دې وروستیو کې له دغه هېواده د افغان کډوالو په شړلو د طالب چارواکو له نیوکو سره مخ شوی دی.
د پاکستان حکومت غواړي له افغانستان سره پر ډیورنډ کرښه درې نورې لارې پرانیزي، چې له دغه هېواده د افغان کډوالو د اېستلو بهیر چټک کړي. د پاکستان ډان ورځپاڼې د دوشنبې په ورځ د (لړم په ۲۲مه) خبر ورکړى، چې نوې لارې به نن پرانيستل شي.
دغې ورځپاڼې د سند ایالت د کورنیو چارو وزارت له خوا د چمتو شوي راپور په حواله لیکلي چې که «بې اسناده افغان کډوال» خپل هېواد ته ونه لېږل شي، پاکستان به له امنیتي ستونزو سره مخ شي.
په دغه راپور کې دا هم ویل شوي، هغه بنسټونه چې د کډوالو د اېستلو مسولیت لري د کډوالو د هویت په ثبت او پروسس کې له ستونزو سره مخ دي.
د پاکستاني رسنیو د خپرو شویو رسمي راپورونو له مخې، ۸۸ زره کډوال یوازې د چمن له لارې افغانستان ته ستانه شوي دي.
د سند حکومت د افغان کډوالو شتون د دې ایالت له پاره د نفوسو د ډیریدو ګواښ بللی او خبرداری یې ورکړی چې که کډوال بیرته خپلو هیوادونو ته وا نه ستول شي نو تر ۲۰۴۰ کال پورې به د دغه ایالت په اجتماعي هویت بدل شي.
په دغه راپور کې ویل شوي چې په سند کې شاوخوا یو لک او ۵۰ زره افغانان د اوسېدو له اسنادو پرته ژوند کوي.
همدارنګه په دغه ایالت کې د بنګال د اتباعو شمېر ۲۶زره ۸۲۰ او د برما د اتباعو شمېر ۱۹۸۰ ته رسېږي.
د طالبانو کډوالو چارو وزارت وایي چې د (لړم په ۲۱مه) نیټه د سپین بولدک او تورخم له لارې پنځه زره او ۵۷ کډوال افغانستان ته راستانه شول. دغه وزارت په خپله اېکس پاڼه لیکلي چې، په راستانه شویو کسانو کې لس تنه یې په پاکستان کې بندیان شوي کډوال و.
د راپورونو له مخې، یاد شمېر کسان د کډوااو په ادارو کې له ثبت وروسته د کډوالو د نړیوال سازمان دفتر ته د مرستو د ترلاسه کولو په موخه ور پیژندل شوي.
له دې سره، د پکتیکا ولایت د کډوالو چارو ریاست بیا په دې ولایت کې راستنېدونکو کډوالو ته په دریو پنډغالو کې د ۵۲ خیمو د درولو خبر ورکړ.
دغه ریاست وایي، دا درې لنډمهاله پنډغالي چې ډیورنډ کرښې ته څېرمه په تروو، انګور هډه او د پکتیکا په مرکز ښرنه کې جوړ شوي دي، راستنیدونکو کډوالو ته د سرپناه، خوراکي توکو، پاکو اوبو او د روغتیایي خدمتونو په برخو کې همکاري کوي.
د پاکستاني قامي اسمبلۍ پخوانی وکیل او د پښتون ژغورنې غورځنګ مخکښ غړی علي وزیر په سوېلي پښتونخوا چمن کې پرلت وهونکو ته په وینا کې وویل، «همدا پاکستان دی چې افغانستان او پښتانه يې د مذهب په نوم تباه کړي دي.»
دغه پرلت ټیک ۲۳ ورځې وړاندې د چمن ـ سپین بولدک په دروازه د پاسپورټ او وېزې د حتمي کېدو په غبرګون کې پیل شوی او لا روان دی.
نوموړی وايي، پر سپین بولدک ـ چمن دروازه پاسپورټ نه منو او له افغان وطن څخه د پښتونو په زور اېستل او د هغوی کاروبار یرغمل کول ورته د منلو وړ نه دی.
د پاکستان حکومت له لوري پرلت ته په ورتلو د بندیزونو او مخنیوي سره سره د علي وزیر په ګډون د پښتون ژغورني غورځنګ ګڼ شمېر غړو د دوشنبې په ورځ د (لړم ۲۲مه) د چمن په پرلت کې ګډون وکړ.
علي وزیر د چمن پرلت ته په خپله وینا کې وویل: «پاکستان پښتانه او افغانستان د مذهب په نوم تباه کړي دي. دغه د پاسپورټ مسله او د افغان وطن څخه افغانان په زور شړل او د دوی کاروبار یرغمل کول نه منو. داسې ورځ به راځي چې همدا پښتانه او افغانان به ستا د دې ظلمونو سزا حتمآ درکوي. موږ د پاکستان سوداګریزې پالیسيانې نه منو، پاکستان پر اسلام او جهاد هم سواګري کوي.»
په دغه پرلت کې د بلوچستان ایالت څخه ګڼو سیاسي ګوندونو ګډون کړی او دا لومړی ځل دی چې د پاکستان د بېلابیلو سیمو بیلابیل سیاسي ګوندونه او غورځنګونه په یوه خوله په دغه پرلت کې راټول شوي دي.
د پښتون ژغورني غورځنګ یو بل غړی حنیف خان پښتین چې د پښتونو د حقونو د ترلاسه کولو په مبارزه کې څلور کاله بندي شوی پرلت ته په خپله وینا کې وویل: «موږ د دغه پرلت ملاتړ کوو، که پرلت دا غوښتنه لري چې موږ ته پاسپورټ د منلو وړ نه دی زه وایم چې موږ ته دا د ډیورنډ کرښه بیخي د منلو وړ نه ده. د پاکستان له لوري د افغان کډوالو سره ترسره کیدونکی ظلم موږ ته د منلو وړ نه دی موږ چمتو یو چې قرباني ورکړو او د پښتنو په خاوره کې د پاکستان د سوداګریزو پالیسیو مخه ونیسو.»
د پاکستان حکومت له لورې هڅه کیږي چې د چمن پر پرلت بندیزونه ولګوي.
د بلوچستان ایالت پولیسو درې ورځې وړاندې په دغه پرلت کې د پښتون سیاستوال محسن داوړ د ګډون مخنیوي هم کړی و.
د بلوچستان پولیسو په بېلابیلو سیمو کې د پښتون ژغورني غورځنګ لسګونه کسانو مخه نیولي چې غوښتل یې په دغه پرلت کې ګډون وکړي.
د سوېلي پښتونخوا په چمن ښار کې ډیورنډ کرښې ته نږدي د یوې پوځي اډې مخې ته لسګونه زره کسانو د تېرو ۲۳ ورځو راهیسې پرلت وهلی دی.
دغه پرلت وهونکي د پاکستان د هغې پرېکړي په غبرګون کې پرلت وهلی چې د سپین بولدک ـ چمن پر دروازه به تګ راتګ په پاسپورټ او وېزهترسره کیږي.